ახალგორის გამგებელის, ნუგზარ თინიკაშვილის თქმით, 63 წლის ახალგორელი პაციენტი, რომელიც ოკუპირებული რეგიონიდან საქართველოს კონტროლირებად ტერიტორიაზე გადმოყვანისას გარდაიცვალა, თვეების განმავლობაში ითხოვდა ე.წ. საზღვარზე გაშვებას. ამ თემაზე მან TV პირველთან ისაუბრა.

"დაავადებაზე და დიაგნოზზე ვერაფერს გეტყვით, ერთი ვიცი, რომ ცუდად იყო, ცხინვალში ჰყავდათ წითელ ჯვარს უნდა გადმოყვანა დღეს, მაგრამ საღამოს რომ დამძიმდა, გუშინვე წამოიყვანეს და გზაში დაიღუპა კარალეთთან. როგორც ვიცი რამდენიმე თვე თხოულობდა გადმოსვლას, მაგრამ არ აძლევდნენ უფლებას — თქვა ნუგზარ თინიკაშვილმა.

შერიგებისა და სამოქალაქო საკითხებში სახელმწიფო მინისტრის ინფორმაციით, პაციენტი ინსულტის დიაგნოზით ახალგორის საავადმყოფოში მკურნალობდა, რის შემდეგაც ცხინვალის კლინიკაში გადაიყვანეს და 5 დღე გააჩერეს. დე ფაქტო ხელისუფლებამ მხოლოდ გუშინ, 19 მაისს მიიღო გადაყვანაზე დადებითი გადაწყვეტილება და 9 საათზე ის წითელი ჯვრის ხაზით გორის საავადმყოფოში წაიყვანეს, თუმცა გზაში, კარალეთის ტერიტორიაზე გარდაიცვალა.

მინისტრის თქმით, გარდაცვლილი არის მორიგი მსხვერპლი არაადამიანური და ამავდროულად სრულიად არალეგარული შეზღუდვებისა, რომელიც აქვს მოსახლეობას ცხინვალის რეგიონში იზოლაციის პირობებში.

"არ უნდა ფერხდებოდეს ასეთ გადაუდებელ სამედიცინო საჭიროებაზე მაინც გადაადგილება, მით უფრო მოგეხსენებათ, რომ ახალგორელებს ექმნებათ ძირითადად ეს პრობლემა, რაც არის აბსოლუტურად, კატეგორიულად მიუღებელი, ატარებს ეთნიკურ ნიშანსაც და ეს კიდევ უფრო ამძიმებს, აი, ამ მოქმედებებს, რასაც ახორციელებს რეჟიმი", — განაცხადა მან.

ეს პირველი შემთხვევა არ არის, როდესაც საოკუპაციო რეჟიმი პაციენტების სამკურნალოდ გაშვებას აფერხებს, რაც ფატალური შედეგით სრულდება. სადამკვირვებლო ორგანიზაციები აცხადებენ, რომ ოკუპირებულ რეგიონში ჰუმანიტარული კრიზისია.