შინაგან საქმეთა სამინისტრომ ე.წ. ქურდული სამყაროს წევრობის, მათი წევრისთვის მიმართვის, საქმიანობის მხარდაჭერის, თავისუფლების უკანონოდ აღკვეთისა და ძალადობის ბრალდებით 13 პირი დააკავა. მათი ინფორმაციით, სპეცოპერაცია თბილისში, ცაგერში, ხაშურსა და ბათუმში ერთდროულად ჩატარდა.

უწყების განმარტებით, გამოძიებით დადგინდა, რომ საქართველოში მოქმედი ერთ-ერთი ბიზნესმენი 2020 წლის მარტის თვეში ე.წ ქურდული სამყაროს წევრებმა მოტყუებით წაიყვანეს ქ. თბილისში მდებარე წინასწარ ნაქირავებ ბინაში, სადაც უკანონოდ აღუკვეთეს თავისუფლება, ტელეფონის მეშვეობით დაალაპარაკეს საზღვარგარეთ მყოფ ქართველ ე.წ. კანონიერ ქურდს, რომლის გადაწყვეტილების საფუძველზეც, გათავისუფლების სანაცვლოდ, 7 500 აშშ დოლარი გამოსძალეს. მათივე თქმით, ძალადობითა და სისტემატიური ზეწოლის გზით, 50 000 ამერიკული დოლარის 2 თვის ვადაში გადახდა დააკისრეს.

უწყებაში ამბობენ, რომ სამ დაკავებულის დანაშაულებრივი საქმიანობა კიდევ 2 ეპიზოდში გამოიკვეთა. კერძოდ, 2020 წლის მარტში და აპრილში, აღნიშნული პირები, მოდავე მხარეების მიმართვის საფუძველზე, ავტომანქანების გასხვისებასთან დაკავშირებულ დავებში ჩაერთნენ. შსს-ს განცხადებით, მათ საზღვარგარეთ მყოფი ე.წ კანონიერი ქურდების მხარდაჭერით მოაწყვეს "ქურდული გარჩევები" და სხვადასხვა მხარეებს გარკვეული თანხის გადახდა დააკისრეს.

უწყებაში ამბობენ, რომ ჩატარებული ჩხრეკის შედეგად, ნივთმტკიცებად ამოიღეს 3 ძვირადღირებული ავტომანქანა, 16 000 აშშ დოლარი, კომპიუტერული ტექნიკა და ბრალდებულების მობილური ტელეფონები, რომელთა საშუალებითაც ისინი ერთმანეთს და საზღვარგარეთ მცხოვრებ ქართველ "კანონიერ ქურდებს" უკავშირდებოდნენ.

საქმეზე გამოძიება "ქურდული სამყაროს" წევრობის, წევრისთვის მიმართვის, საქმიანობის მხარდაჭერის, თავისუფლების უკანონოდ აღკვეთისა და ძალადობის ბრალდებით საქართველოს სისხლის სამართლის კოდექსის 223-ე პრიმა მუხლის პირველი ნაწილით, 223 მე-3 პრიმა-მუხლის მე-2 ნაწილით, 223-ე მე-4 პრიმა-მუხლით, 143-ე მუხლის მე-3 ნაწილით და 126-ე მუხლის პირველი ნაწილით მიმდინარეობს. ამ მუხლებით გათვალისწინებული დანაშაული 3-დან 10 წლამდე ვადით თავისუფლების აღკვეთას ითვალისწინებს.