"ეს არ არის ემოციური გადაწყვეტილება, ეს არ არის სამართლებრივი გადაწყვეტილება, ეს არის სახელმწიფოებრივი გადაწყვეტილება იმიტომ, რომ დღეს ვართ არაორდინალურ სიტუაციაში", — ასე შეაფასა რუსთავი 2-ის ეთერში პრეზიდენტმა, სალომე ზურაბიშვილმა ოპოზიციის ლიდერების შეწყალების საკითხი.

ზურაბიშვილის თქმით, მან პრეზიდენტობის დასაწყისშივე აღნიშნა, რომ ზეპარტიული იქნებოდა და ყველაფერს გააკეთებდა დაპირისპირებისა და პოლარიზაციის დასასრულებლად, ამიტომ, მისი აზრით, ეს ლოგიკური გადაწყვეტილებაა.

სალომე ზურაბიშვილმა ოპოზიციის ლიდერები, გიგი უგულავა და ირაკლი ოქრუაშვილი 15 მაისს შეიწყალა. მან აღნიშნა, რომ ის არ იწყალებს პოლიტპატიმრებს, რადგან ისინი ქვეყანას არ ჰყავს და ეს შეწყალება ჩვეულებრივ ჰუმანურ პრინციპებს არ ეფუძნება. მისი განმარტებით, გადაწყვეტილება მიიღო, რადგან ქვეყანა პოლიტიკური კრიზისის წინაშე იდგა და პრეზიდენტი ვერ დაუშვებდა პოლიტიზაციასა და დაპირისპირებას.

პრეზიდენტის გადაწყვეტილება წინ გადადგმულ ნაბიჯად შეაფასეს საერთაშორისო პარტნიორებმა და ხელისუფლებას მოუწოდეს, რომ შეთანხმება სრულად შეასრულოს.

გაიგეთ მეტი: