საერთო სასამართლო სისტემაში, სავარაუდოდ, კომერციული პალატები შეიქმნება, რომლებიც მოსარჩელეს საშუალებას მისცემს მიიღოს, სწრაფი რეაგირება სასამართლოსგან. ამ და სხვა საკითხებზე წულუკიანმა პარლამენტში საკომიტეტო მოსმენისას ისაუბრა. მისივე თქმით, უკვე შემუშავებულია გარკვეული პროექტი საერთო სასამართლო სისტემაში კომერციული პალატების შექმნასთან დაკავშირებით:

"დღეს რომ შეიტანს სარჩელს შეიძლება ერთი წლის და მეტის თავზე ჩაინიშნოს პირველი სხდომა, რადგან სასამართლო უკვე არის გადატვირთული. ჩვენ გვინდა, რომ მივეხმაროთ სასამართლოს, განვტვირთოთ ის. მოქალაქეს შევუქმნათ გარანტია იმისა, რომ სწრაფი მართლმსაჯულება ექნება და რაც მთავარია ხარისხიანი. ამიტომაც კომერციული პალატები განიხილავენ ბიზნეს საქმეებს. ჩვენ, რა თქმა უნდა არ ვფიქრობთ, რომ ეს შემოვფარგლოთ მხოლოდ დიდი ბიზნესისთვის. მცირე და საშუალო ბიზნეს განვითარება სჭირდება ჩვენს ქვეყანაში, ამიტომ მათ სჭირდებათ დაცულობის გარანტია."

იუსტიციის მინისტრობის კანდიდატმა მიიჩნევს, რომ აღნიშნული ინიციატივის განხორციელების შემთხვევაში, სასამართლო სისტემაში ახალი კადრები შევლენ და რომ კომერციული პალატები კორპორატიული სამართლის სპეციალისტებისგან უნდა დაკომპლექტდეს.

კიდევ ერთი საკითხი, რომელზეც წულუკიანმა ისაუბრა არის არბიტრაჟი:

"ჩვენ მოლაპარაკებები დავიწყეთ ზაფხულში და გადავდივართ ინტენსიურ ფაზაში ICC-სთან თქვენ იცით, რომ ეს არის ერთ-ერთი ყველაზე ძველი სასამართლო საერთაშორისო არბიტრაჟის, რომლის შესაბამისი კონვენციის რატიფიკაცია ჩვენი მთავრობის პირობებში მოხდა. ჩვენ მოლაპარაკებებს ვაწარმოებთ იმასთან დაკავშირებითაც, რომ მისი ფილიალი გაიხსნას საქართველოში."

წულუკიანის თქმით, მომავალი წლის დასაწყისში, სავარაუდოდ, თბილისის საქალაქო სასამართლოში ელექტრონული განაწილების საპილოტე პროგრამა დაინერგება:

"ელექტრონული განაწილების პროგრამა უკვე არის პრაქტიკულად მზად. მოსამართლეებთან ერთად ჩვენ ვიმუშავეთ იმისთვის, რომ მომავალი წლის დასაწყისში ერთ-ერთ საპილოტე, სავარაუდოდ თბილისის საქალაქო, ყველაზე დიდ სასამართლოში ის დაინერგოს პილოტურ რეჟიმში. რა თქმა უნდა, აქ გვაქვს თქვენი იმედი, იმისთვის, რომ მესამე ტალღა რეფორმის, რომელიც წინა პარლამენტის პირობებში ვერ იქცა კანონად, გადაიქცეს კანონად."

22 ნოემბერს თეა წულუკიანმა განაცხადა, რომ გოგონების გენიტალიების დამახინჯების საქართველოში დაფიქსირებული რამდენიმე ფაქტი სასწრაფოდ უნდა აღმოიფხვრას. მისივე თქმით, პარლამენტის მხარდაჭერის შემთხვევაში გოგონების წინადაცვეთა სისხლის სამართლის წესით დაისჯება.