სატელევიზიო შოუების მოყვარულებს არაერთი ცნობილი სერიალი ახსოვთ, რომლებმაც ჯერ მილიონობით მაყურებლის ყურადღება მიიქცია, შემდეგ კი სხვადასხვა მიზეზის გამო იმედგაცრუებული დატოვა ისინი.

ეს, როგორც წესი, იმის გამო ხდება, რომ მსახიობები სერიალიდან მიდიან, შოუს შემქმნელებს არაფრის დიდებით არ სურთ სერიალის დროულად დასრულება და ხელოვნურად წელავენ სიუჟეტს ან უბრალოდ თავდაპირველი გზიდან უხვევენ და უცნაურ ექსპერიმენტებს გვთავაზობენ.

ახლა სწორედ რამდენიმე ასეთი მაგალითის შესახებ გიამბობთ, როცა მაყურებლების დიდი ნაწილი კონკრეტული სეზონ(ებ)ით იმედგაცრუებული დარჩა.

1. American Horror Story — სეზონი 6

ამ სეზონის იმედგაცრუებად ისიც საკმარისია, რომ დიდი მოლოდინების მიუხედავად, ლედი გაგას რატომღაც სრულიად ბუნდოვანი, რამდენიმეწუთიანი როლი ჰქონდა.

აქვე ისიც უნდა აღინიშნოს, რომ ბევრის აზრით, რაიან მერფიმ ხარისხის შენარჩუნება მხოლოდ სამი სეზონის განმავლობაში შეძლო, შემდეგ კი შოუ ნელ-ნელა უფრო და უფრო ცუდი გახდა.

2. Black Mirror — სეზონი 5

ბევრ მათგანს, ვინც ამ შოუს გამოსვლის დღიდან ადევნებდნენ თვალს, მიაჩნია, რომ ამ ანთოლოგიამ გაუარესება მას შემდეგ დაიწყო, რაც მის წარმოებაზე პასუხისმგებლობა მთლიანად ნეტფლიქსმა აიღო, მაგრამ ჯერჯერობით ბოლო, მეხუთე სეზონმა არა მარტო მათი, არამედ ნაკლებად სკეპტიკური მაყურებლების უარყოფითი შეფასებებიც კი დაიმსახურა.

3. Shameless — სეზონი 10

ფიონა გალაჰერის გარეშე შოუმ თავისი ხიბლი ნამდვილად დაკარგა.

4. Vikings — სეზონი 5

ერთგული მაყურებლების დიდი ნაწილი ფიქრობს, რომ სერიალის სიუჟეტი რაგნარის სიკვდილის შემდეგ გაუარესდა.

5. The Office — სეზონი 8

მაიკლ სკოტის წასვლამ იმდენად გაანაწყენა მაყურებლები, რომ შემდეგ სეზონთან მის გარეშე შეგუება ბევრს გაუჭირდა.

6. How I Met Your Mother — სეზონი 9

ესეც კიდევ ერთი სიტკომი, რომელმაც მაყურებლების ურთიერთსაწინააღმდეგო შეფასებები დაიმსახურა: ნაწილს სერიალის ფინალური სეზონი მოეწონა, მაყურებლების მეორე ნაწილი კი ბევრი დეტალის გამო დარჩა იმედგაცრუებული.

7. Game of Thrones — სეზონი 8

სატელევიზიო შოუების ისტორიაში სერიალის დასასრულით გამოწვეული ყველაზე დიდი იმედგაცრუება სწორედ HBO-ს ამ საკულტო ეკრანიზაციას მერვე სეზონს უკავშირდება: უკმაყოფილო მაყურებლებმა ფინალური სეზონის ხელახლა გადასაღებად პეტიციაც კი შექმნეს.

8. True Detective — სეზონი 2

კოლინ ფარელისა და რეიჩელ მაკადამსის სამსახიობო ოსტატობამაც კი ვერ იხსნა ეს სეზონი მაყურებლების კრიტიკისგან.

9. House of Cards — სეზონი 6

როგორც ამბობენ, ეს სერიალი კევინ სპეისის კარიერასავით ცუდად დამთავრდა.

10. Altered Carbon — სეზონი 2

2018 წელს ნეტფლიქსის პლატფორმაზე გამოჩენილმა ამ ახალ შოუმ სამეცნიერო ფანტასტიკის მოყვარულების დიდი მოწონება დაიმსახურა, თუმცა ამავე ჟანრის მოყვარულებისთვის სერიალის წელს გამოსული მეორე სეზონი ნამდვილი იმედგაცრუება გამოდგა.

11. Grey's Anatomy — ბოლო რამდენიმე სეზონი

ამ სერიალის ყველაზე ერთგული გულშემატკივრებიც კი აღიარებენ, რომ მან თავისი ნამდვილი ხიბლი დიდი ხნის წინ დაკარგა.

12. Supernatural — ბოლო რამდენიმე სეზონი

ბევრი ფიქრობს, რომ ეს სერიალი გრეის ანატომიის მსგავსად ჯერ კიდევ წლების წინ უნდა დასრულებულიყო და ახლა მხოლოდ ინერციით, შოუს თავდაპირველი სიყვარულის გამო ადევნებენ თვალს.

თქვენი აზრით, კიდევ რომელი სერიალის "ცუდი" სეზონი იმსახურებს ამ ჩამონათვალში მოხვედრას?