ეკონიმიკის მინისტრის, ნათია თურნავას განცხადებით, ბალტიის ქვეყნებთან ფრენების აღდგენაზე მუშაობენ. თურნავას თქმით, მას ონალაინშეხვედრა ლიეტუვას ტრანსპორტისა და კომუნიკაციების მინისტრთან ჰქონდა.

"ჩვენ ვემზადებით ტურისტული სეზონის გახსნისთვის. პრაქტიკულად ყოველდღიურ რეჟიმში გვაქვს კომუნიკაცია ჩვენს კოლეგებთან, განსაკუთრებით იმ ქვეყნებიდან, საიდანაც ველოდებით ტურისტულ ნაკადებს. მნიშვნელოვანია, რომ ავიაკომპანია ვიზეარმა უკვე გამოხატა სურვილი, რომ აღდგეს რეგულარული მიმოსვლა ვილნიუსსა და ქუთაისს შორის, ასევე ბალტიის ორ დანარჩენ სახელმწიფოსთანაც", — აღნიშნა თურნავამ.

მთავრობის ანტიკრიზისული გეგმის თანახმად 15 ივნისიდან უნდა გაიხსნას შიდა ტურიზმი, ხოლო პირველი ივლისიდან საერთაშორისო ტურისტების მიღება იგეგმება. როგორც მთავრობაში აცხადებენ, საქართველო ტურისტებისთვის უსაფრთხო ზონად უნდა იქცეს.