პრეზიდენტ სალომე ზურაბიშვილის განცხადებით, გიგი უგულავა და ირაკლი ოქრუაშვილი შეიწყალა არა როგორც სალომე ზურაბიშვილმა, არამედ როგორც პრეზიდენტმა.

მისი თქმით, ეს შეწყალება ჰუმანურ პრინციპებს არ ეფუძნება, რადგან მან ყველაზე კარგად იცის ამ ადამიანების დანაშაულები და მისი გადაწყვეტილება მხოლოდ ქვეყნის ინტერესებითაა განპირობებული.

"ეს შეწყალება არ ეფუძნება ჩვეულებისამებრ ჰუმანურ პრინციპებს ან ფაქტობრივ გარემოებებს, რომლის გამოც, ადამიანს შესაძლოა, სასჯელი შეუმსუბუქდეს ან სრულად გაუუქმდეს. ხაზი მინდა გავუსვა, რომ მე ამ გადაწყვეტილებას ვიღებ არა როგორც სალომე ზურაბიშვილი, რომელმაც ყველაზე კარგად იცის ამ ადამიანების რეალური ქმედებები და ქვეყნის წინაშე დანაშაულები, არამედ როგორც ქვეყნის პრეზიდენტი. როგორც კონსტიტუცია ამის უფლებას მანიჭებს, მარტო ჩემი პასუხისმგებლობით ვიღებ ამ გადაწყვეტილებას, გამომდინარე მხოლოდ და მხოლოდ ქვეყნის ინტერესებიდან", — განაცხადა სალომე ზურაბიშვილმა.

როგორც ზურაბიშვილმა თქვა, მისი პრინციპულობა არსად წასულა და ზუსტად ამის გამო არ დააყენებს პირად ემოციებს ქვეყნის ინტერესებზე მაღლა.

"როგორც საზოგადოებამ კარგად იცის, მე ამ ქვეყანაში ჩამოვედი არც პირადი ამბიციების, არც მატერიალური ან სხვა ინტერესების დასაკმაყოფილებლად. მე მხოლოდ და მხოლოდ ჩემი სამშობლოს ბედი და მომავალი მაინტერესებდა და მაინტერესებს დღესაც. ამის გამო მოვითმინე და კიდევ მოვითმენ შეურაცხყოფას. ჩემი პრინციპულობა არსად წასულა და ზუსტად პრინციპულობის გამო ჩემს ემოციებსა და ჩემს პირად შეხედულებებს ვერ და არ დავაყენებ ქვეყნის ინტერესებზე მაღლა", — განაცხადა ზურაბიშვილმა.

დღეს, 15 მაისს სალომე ზურაბიშვილმა გიგი უგულავა და ირაკლი ოქრუაშვილი შეიწყალა.