მიუღებელია ხელისუფლებისადმი კრიტიკულად განწყობილ მედია საშუალებასთან ამ ფორმით ბრძოლა. რუსთავი 2-ის სარედაქციო დამოუკიდებლობის და ჟურნალისტების დაცვა ქვეყნის ინტერესებში უნდა იყოს, რადგანაც მრავალფეროვანი მედია გარემო ხელს უწყობს ქვეყანაში დემოკრატიის მაღალი სტანდარტის დამკვიდრებას. ამის შესახებ განცხადებას საერთაშორისო გამჭვირვალობა - საქართველო ავრცელებს.

TI მიჩნევს, სააპელაციო სასამართლოს გადაწყვეტილება რუსთავი 2-ის 100% წილის ქიბარ ხალვაშისათვის მიკუთვნების შესახებ, უზანაესმა სასამართლომ სამართლიანად უნდა გადაწყვიტოს:

"რუსთავი 2-ის მფლობელობასთან დაკავშირებით წლების მანძილზე ბევრი კითხვა ისმოდა. ეს კითხვები განსაკუთრებით მწვავე იყო სწორედ ქიბარ ხალვაშის მიერ რუსთავი 2-ის წილის გადაცემასთან დაკავშირებით. შესაბამისად, მიგვაჩნია, რომ თუ სასამართლოს აღნიშნული გადაწყვეტილების მიზანი ე.წ. სამართლიანობის აღდგენაა, ქიბარ ხალვაშისთვის ტელევიზიის გადაცემა ამ შეფასებას ნამდვილად ვერ იმსახურებს."

TI-ის განცხადებით, რუსთავი 2-ის სასამართლო პროცესი გამოირჩეოდა მოსამართლეების მიკერძოებული დამოკიდებულებით:

"მოსამართლე თამაზ ურთმელიძის 5 ნოემბრის განჩინება, წინააღმდეგობაში მოდიოდა, ერთი მხრივ, კანონმდებლობასთან და, მეორე მხრივ, წარმოადგენდა დამოუკიდებელი მედიის საქმიანობაში უხეში ჩარევის პრეცედენტს."

საერთაშორისო გამჭვირვალობა მიიჩნევს, რომ საქალაქო და სააპელაციო სასამართლოების გადაწყვეტილებები უარყოფით გავლენას ახდენს მედიის მრავალფეროვნებაზე. ორგანიზაციის განმარტებით, აღნიშნული გადაწყვეტილებები მომავალში საკუთრების უფლებასთან დაკავშირებული დავებთან მიმართებით პრობლემურია და უარყოფით გავლენას მოახდენს საინვესტიციო გარემოზეც, რადგან მესაკუთრეების საკუთრების უფლების დაცვის დაბალი სტანდარტები ინვესტორებისთვის არახელსაყრელი მოცემულობა იქნება.

"აღსანიშნავია, რომ საქართველოს უზენაესი სასამართლოს სამოქალაქო პალატამ 2016 წლის 20 მაისს რუსთავი 2-ის საქმის მსგავს საქმეზე (N ას-1224-1149-2015) გააუქმა თბილისის სააპელაციო სასამართლოს გადაწყვეტილება და საქმე ხელახლა განსახილველად დაუბრუნა სააპელაციო სასამართლოს." - წერია განცხადებაში.