პარლამენტის ფრაქცია პატრიოტთა ალიანსი და სოციალ-დემოკრატების წევრი, გია ჟორჟოლიანია 8 მარტის შეთანხმებასთან დაკავშირებით ოპოზიციასა და ხელისუფლებას შორის არსებულ დავას "ჭიქაში ქარიშხალს" უწოდებს.

მისი თქმით, ამ შეთანმხებაში პოლიტპატიმრების გათავისუფლება არსად არ წერია, მაგრამ წერია, რომ სასამართლო პროცესი პოლიტიკური მიზანშეწონილობით არ უნდა წარიმართოს.

"მე მგონია, რომ ეს დღევანდელი წამოჭრილი დისკუსია, ეს არის ქარიშხალი ჭიქაში. როგორც ერთი, ისე მეორე მხარე ცდილობს, რომ ერთმანეთს წაუყენოს ბრალდებები. შესაძლოა, არცერთო მათგანი არ არის მოსურნე იმისა, რომ ეს ცვლილებები იქნას მიღებული. თუ ამ სფეროშიც ოცნება ცუდად იქცევა, მაგალითა, ევროპული საქართველოსა და ნაციონალური მოძრაობის თვალსაზრისით, ამის გამო საარჩევნო ცვლილებებზე უარის თქმა ეწინააღმდეგება ლოგიკას. თუ ეს საარჩევნო სისტემა კარგია და სასარგებლოა ყველა პარტიისათვის, მაშინ ეს სასარგებლო უნდა იყოს იმისათვის, დაამარცხო ოცნება", — აცხადებს ჟორჟოლიანი.

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან. მმართველი გუნდი კი ამბობს, რომ შეთანხმებაში არ ეწერა არცერთი პოლიტიკოსის გათავისუფლების საკითხი.

ოპოზიცია აცხადებს, რომ ამ პირობის შესრულების გარეშე საარჩევნო ცვლილებებს მხარს არ დაუჭერენ. 8 მარტის შეთანხმებასთან დაკავშირებით განცხადება დიპლომატებმაც გაავრცელეს, სადაც ამბობენ, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, რაც სასამართლო სისტემაში პოლიტიკურ ჩარევას ჰგავს.

8 მარტს ოპოზიციასა და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.