8 მარტი შეთანხმებასთან დაკავშირებული კითხვების შემდეგ პატრიოტთა ალიანსის ლიდერი, ირმა ინაშვილი განცხადებას ავრცელებს. ინაშვილი ამბობს, რომ შეთანხმების მეორე პუნქტი მისთვის ბუნდოვანი იყო.

როგორც პარლამენტის დეპუტატი ფეისბუქზე წერს, მეორე პუნქტში ნაციონალური მოძრაობა და ევროპული საქართველო გიგი უგულავასა და სხვების გათავისუფლებას გულისხმობდნენ, ხოლო ქართული ოცნება — სხვა რამეს.

"მე ვადასტურებ, რომ ამ შეხვედრებზე ნაცმოძრაობაც და ბოკერიას პარტიაც, ასევე, მათ ირგვლივ გაერთიანებული პარტიები ნამდვილად გადადიოდნენ სხვა საკითხზე. კერძოდ, უგულავას გათავისუფლების საკითხზე და არა მარტო უგულავასი. ასევე, ითხოვდნენ პირად ხელშეუხებლობას. მაგალითად, ბოკერია. მე ვადასტურებ, რომ ამ შეხვედრებზე (ჩემი თანდასწრებით) არც არჩილ თალაკვაძე და არც ირაკლი კობახიძე არ დათანხმებულან! მე ასევე ვადასტურებ, რომ შეხვედრები იყო ჩემს გარეშეც, ისინი ერთმანეთს ხვდებოდნენ ჩემს გარეშეც და ბოლოს, მე ვადასტურებ, რომ 8 მარტის შეხვედრაზე წარმოდგენილი იყო დოკუმენტი, რომლის პირველ პუნქტს დავეთანხმე, რადგან საარჩევნო სისტემის ცვლილებას ეხებოდა", — აცხადებს ინაშვილი.