ნაციონალური მოძრაობის თავმჯდომარის, გრიგოლ ვაშაძის განცხადებით, ქართულმა ოცნებამ დიპლომატიური პროტოკოლი დაარღვია, რადგან მედიატორებს სთხოვენ მხარე გახდნენ. TV პირველის ეთერში ვაშაძემ აღნიშნა, რომ ის რაც დღეს მოხდა, სამწუხარო და შემაწუხებელია.

"დარღვეული არის მთლიანად დიპლომატიური და დემოკრატიული პროტოკოლი, როცა მედიატორებს სთხოვ, ფაქტობრივად, მხარე გახდნენ. გამოვიდნენ ამ დისკუსიაში, რომელიც უადგილოა და თავისი განცხადებებით მედიატორის როლს საფრთხე შეუქმნან და ზიანი მიაყენონ".

მისივე თქმით, არჩილ თალაკვაძის დღევანდელი განცხადება 8 მარტის შეთანხმებასთან დაკავშირებით უადგილო და კონტრპროდუქტიული იყო. გარდა ამისა, ოპოზიციური პარტიის ლიდერი ამბობს, რომ მოლაპარაკებების დროს, პატიმრების გათავისუფლების საკითხზე არაერთხელ უსაუბრიათ როგორც ფორმალურ, ისე არაფორმალურ შეხვედრებზე.

"არც ერთი ოპოზიციური პარტია ხელს არ მოაწერდა ამ დოკუმენტს შეთანხმებას, ორი ფუნდამენტური პუნქტი რომ არ ჰქონოდა: საარჩევნო სისტემის შეცვლა და პოლიტპატიმრების გათავისუფლება", — განაცხადა ვაშაძემ.

8 მარტს ოპოზიციასა და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.

ოპოზიციური პარტიები, რომლებიც მოლაპარაკებებში იღებდნენ მონაწილეობას აცხადებენ, რომ საკონსტიტუციო ცვლილებებს მხარს არ დაუჭერენ, სანამ პოლიტპატიმრები არ გათავისუფლდებიან.

დღეს, 11 მაისს პარლამენტის თავმჯდომარემ ქართული ოცნების სახელით ითხოვა, რომ საარჩევნო სისტემაზე მოლაპარაკებაში ჩართულმა ელჩებმა, შეთანხმების შინაარსი გაასაჯაროვონ. გარდა ამისა, თალაკვაძემ სთხოვა მათ, საჯაროდ დაადასტურონ, რომ გიგი უგულავას, ირაკლი ოქრუაშვილისა და გიორგი რურუას გათავისუფლების ვალდებულება ქართულ ოცნებას არ აუღია.