თბილისის მერისა და ქართული ოცნების გენერალური მდივნის, კახა კალაძის განცხადებით, 8 მარტის შეთანხმებაში პატიმრების გათავისუფლება განხილულიც არ ყოფილა. ამის შესახებ მერმა ჟურნალისტებს განუცხადა.

"8 მარტის შეთანხმებაში განხილულიც არ ყოფილა და ვერ იქნებოდა, ელჩების თანდასწრებით არავინ აიღებდა პასუხისმგებლობას, რომ უკანონობა ჩაედინათ. შესაბამისად შინაარსი მოცემული არის ე.წ. მემორანდუმის დოკუმენტში, რაც საზოგადოებამ იხილა", — აღნიშნა კალაძემ.

მისივე თქმით, მმართველი პარტია მზადაა, რომ საკონსტიტუციო ცვლილებები განახორციელოს და ამისთვის სრულად მობილიზებულია.

8 მარტს ოპოზიციასა და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.

ოპოზიციური პარტიები, რომლებიც მოლაპარაკებებში იღებდნენ მონაწილეობას აცხადებენ, რომ საკონსტიტუციო ცვლილებებს მხარს არ დაუჭერენ, სანამ პოლიტპატიმრები არ გათავისუფლდებიან.

დღეს, 11 მაისს პარლამენტის თავმჯდომარემ ქართული ოცნების სახელით ითხოვა, რომ საარჩევნო სისტემაზე მოლაპარაკებაში ჩართულმა ელჩებმა, შეთანხმების შინაარსი გაასაჯაროვონ. გარდა ამისა, თალაკვაძემ სთხოვა მათ, საჯაროდ დაადასტურონ, რომ გიგი უგულავას, ირაკლი ოქრუაშვილისა და გიორგი რურუას გათავისუფლების ვალდებულება ქართულ ოცნებას არ აუღია.