პარლამენტის თავმჯდომარემ ქართული ოცნების სახელით ითხოვა, რომ საარჩევნო სისტემაზე მოლაპარაკებაში ჩართულმა ელჩებმა, შეთანხმების შინაარსი გაასაჯაროვონ. გარდა ამისა, თალაკვაძემ სთხოვა მათ, საჯაროდ დაადასტურონ, რომ გიგი უგულავას, ირაკლი ოქრუაშვილისა და გიორგი რურუას გათავისუფლების ვალდებულება ქართულ ოცნებას არ აუღია.

სპეციალურ ბრიფინგზე მან აღნიშნა, რომ პატიმრების გათავისუფლების პირობა მმართველ გუნდს არავითარი ფორმით არავის წინაშე არ დაუდია.

"შესაბამისად, ყოველგვარი სპეკულაციების დასასრულებლად და შეთანხმების შესრულების უზრუნველსაყოფად, ვთხოვთ მოლაპარაკების ფასილიტატორ ელჩებს, ნათელი მოჰფინონ შეთანხმების შინაარსს. კერძოდ, ვთხოვთ მათ, საჯაროდ დაადასტურონ, რომ ხელმოწერილი შეთანხმებით ჩვენ არ აგვიღია პრეზიდენტისთვის, სასამართლოსა და პროკურატურისთვის უკანონო დავალებების მიცემის და უგულავას, ოქრუაშვილისა და რურუას გათავისუფლების ვალდებულება. ასევე, ვთხოვთ მათ, ობიექტურად შეაფასონ თითოეული ხელმომწერის როლი საარჩევნო სისტემის შესახებ შეთანხმების აღსრულების პროცესში", — განაცხადა თალაკვაძემ.

პარლამენტის თავმჯდომარის განცხადებით, ქართული ოცნება 8 მარტის შეთანხმებას ზედმიწევნით ასრულებს. ოპოზიცია აცხადებს, რომ კანონპროექტს მხარს არ დაუჭერენ, თუ მათი აზრით, პოლიტიკური პატიმრების არ გათავისუფლდებიან. მმართველ პარტიაში კი აცხადებენ, რომ მათ გათავისუფლებაა მხოლოდ "უკანონო დავალების მიცემით" არის შესაძლებელი.