თბილისის მერია მთაწმინდის ფერდობის აღდგენის 16-მილიონიან პროექტს იწყებს. ამის შესახებ დედაქალაქის მერმა, კახა კალაძემ განაცხადა.

მისი თქმით, აღნიშნული პროექტის ფონდ ქართუსთან თანამშრომლობის ფარგლებში ხორციელდება, რისთვისაც ბიძინა ივანიშვილსა და მის ოჯახს მადლობა გადაუხადა.

კალაძის განმარტებით, პროექტი მთაწმინდის ფერდის ტყის ლანდშაფტის სრულ აღდგენა-რეაბილიტაციას ითვალისწინებს.

"ჩვენი მთავარი მიზანი მთაწმინდის ფერდის ლანდშაფტის 4 სეზონადა გადაქცევაა, რაც მარადმწვანე და ფოთლოვანი ხეების, ასევე ბუჩქოვანი და ბალახოვანი საფარის განახლება-რეაბილიტაციას გულისხმობს. იმისთვის, რომ მოხდეს არსებული ხე-მცენარეების ჩანაცვლება და გამოვაცოცხლოთ ქალაქის ფერდი. დაახლოებით 700 ჰექტარზეა საუბარი, რომელიც მთლიანად იქნება განახლებული და ჩანაცვლებული. თბილისს აქვს პოტენციალი, რომ ევროპის ერთ-ერთი ყველაზე მწვანე ქალაქი იყოს და გარწმუნებთ, რომ თბილისი აუცილებლად იქნება სიცოცხლით, სილამაზითა და სიმწვანით სავსე ქალაქი", — განაცხადა კალაძემ.