დღეს, 21 ნოემბერს, პარლამენტის თბილისის შენობაში საკომიტეტო მოსმენებზე თავმჯდომარის მოადგილეები აირჩიეს.

იურიდიული კომიტეტის თავმჯდომარის მოადგილეებად ქართული ოცნებიდან ვანო ზარდიაშვილი და პატრიოტთა ალიანსიდან ნატო ჩხეიძე აირჩიეს. კენჭისყრისას ასევე წარდგენილი იყო ნაციონალური მოძრაობიდან ოთო კახიძე, თუმცა მან საკმარისი ხმა ვერ მიიღო.

მას აქვს საპარლამენტო მუშაობის გამოცდილება. ეს ოჯახი რეპრესირებულიც გახლდათ, მსხვერპლი იყო. იგი ძალიან დიდხანს იბრძოდა სამართლის აღდგენისთვის და დემოკრატიული ფასეულობებისთვის. ამ ყველაფერს ძალიან დიდი მნიშვნელობა აქვს პირადად ჩემთვის.

ეკა ბესელია

უმრავლესობის წევრის ეკა ბესელიას თქმით, პატრიოტათა ალიანსის არჩევით, ოპოზიციური პარტიებიდან ძალები დაბალანსდება:

"15-ვე კვოტას ბუნებრივია ნაციონალური მოძრაობა ვერ აითვისებს, ეს ნიშნავს იმას, რომ სხვა ოპოზიციური პარტია უნდა დავჩაგროთ. ნატო ჩხეიძე ორი მოწვევის პარლამენტის წვერი იყო. მას აქვს საპარლამენტო მუშაობის გამოცდილება. ეს ოჯახი რეპრესირებულიც გახლდათ, მსხვერპლი იყო. იგი ძალიან დიდხანს იბრძოდა სამართლის აღდგენისთვის და დემოკრატიული ფასეულობებისთვის. ამ ყველაფერს ძალიან დიდი მნიშვნელობა აქვს პირადად ჩემთვის".

ჟურნალისტებთან კომენტარი გააკეთა ასევე პატრიოტთა ალიანსის წევრმა ნატო ჩხეიძემ, მისი განცხადებით იგი ყურადღებას გაამახვილებს ყველა იმ საკითხზე, რაც იურიდიულ კომიტეტში იქნება.

კომიტეტის გადაწყვეტილება გააკრიტიკა ნაციონალური მოძრაობის წვერმა ოთო კახიძემ, მისი თქმით, მიუხედავად მათი არჩევანისა, იგი რიგითი წევრის რანგში გააგრძელებს კანონპროექტებზე მუშაობას:

"ქართული ოცნება და პატრიოტთა ალიანსი, როგორც მოთანამშრომლე პოლიტიკური გუნდები, ასე არიან წარმოგენილი. ალიანსს არცერთი კითხვა არ დაუსვამს სესიაზე და ახლა ჩააბარეს მათ პარლამენტის ყველაზე წამყვანი კომიტეტის მაოდგილეობა. მიუხედავად იმისა, რომ კანდიდატმა ვერ დაასახელა ვერცერთი პრიორიტეტული მიმართულება რომელზე მუშაობასაც აპირებს, მაინც ვიმუშავებ ყველა იმ საკითხზე, რომელიც აწუხებს ჩვენს საზოგადოებას, როგორც კომიტეტის რიგითი წევრი".

დღეს აირჩიეს ასევე ადამიანის უფლებათა დაცვის კომიტეტის თავმჯდომარის მოადგილეებიც, ქართული ოცნებიდან გედევან ფოფხაძე და რატი იონათამაშვილი და ოპოზიციიდან გიორგი ტუღუში.

საგარეო ურთიერთობათა კომიტეტის თავმჯდომარეების მოადგილეებად აირჩიეს ქართული ოცნებიდან ნინო გოგუაძე და ნაციონალური მოძრაობიდან სალომე სამადაშვილი.

ევროპასთან ინტეგრაციის კომიტეტის თავმჯდომარის მოადგილეებად, ქართული ოცნებიდან ბექა ნაცვლიშვილი, ირინა ფრუიძე და ნაციონალური მოძრაობიდან გიორგი კანდელაკი.