პარლამენტის ვცე-სპიკერის, მამუკა მდინარაძის განცხადებით, მმართველი პარტია მზადაა იმსჯელოს ნებისმიერ საკითხზე, რათა ოქტომბერში არჩევნები ჩატარდეს. მისი თქმით, ქართული ოცნება მზადაა ესაუბროს, როგორც ოპოზიციას, ისე არასამთავრობო სექტორსა და დარგის სპეციალისტებს.

"მე ახლა ეჭვი მეპარება, რომ ელექტრონული წესით არჩევნების ჩატარებისთვის შესაბამისი ბაზა შეიქმნას ან მოესწროს. დანარჩენი, რაც შეეხება შეზღუდვებისა და რეგულაციების თანხლებით არჩევნების ჩატარებას, ექიმების რეკომენდაციის გათვალისწინებით არჩევნების ჩატარებას, ჩვენ ნებისმიერ მოდელზე სამსჯელოდ მზად ვართ და ღია ვართ", — განაცხადა მამუკა მდინარაძემ.

არასამთავრობო ორგანიზაცია საერთაშორისო გამჭვირვალობა — საქართველო აცხადებს, რომ უკვე უნდა დაიწყოს მსჯელობა საპარლამენტო არჩევნების უსაფრთხოდ ჩატარების საკითხზე.

ორგანიზაციის აზრით, კორონავირუსის პანდემიასთან დაკავშირებული პრობლემების მოგვარება სასიცოცხლოდ მნიშვნელოვანია, თუმცა არც ქვეყნის დემოკრატიული განვითარებისთვის მნიშვნელოვანი საკითხები უნდა დავივიწყოთ.

TI-ში აღნიშნავენ, რომ კვლავ უცნობია, კონკრეტულად როდის და როგორ აპირებს ქართული ოცნება კონსტიტუციური და სხვა საკანონმდებლო ცვლილებების მიღებას. მათი თქმით, იმის გათვალისწინებით, რომ ქვეყანაში საგანგებო მდგომარეობაა გამოცხადებული, რა დროსაც კონსტიტუციის შეცვლა შესაძლებელი არ არის, მნიშვნელოვანია, საზოგადოებამ იცოდეს კონკრეტული გეგმები ამ საკითხთან დაკავშირებით.

რაც შეეხება არჩევნების თარიღს, ეპიდემიოლოგების პროგნოზებიდან გამომდინარე, TI ამბობს, რომ 31 ოქტომბრისთვის გარკვეული შეზღუდვები, დიდი ალბათობით, კვლავ იქნება, ამიტომ აუცილებელია გარკვეული ნაბიჯების გადადგმა, რათა ჩატარებულმა არჩევნებს პოლიტიკური პარტიებისა და საზოგადოების ნდობა ჰქონდეს.

ორგანიზაცია მოუწოდებს ხელისუფლებას, ამ საკითხზე აქტიური კონსულტაციები დაიწყოს ცენტრალურ საარჩევნო კომისიასთან, პოლიტიკურ პარტიებთან, არჩევნებზე მომუშავე ადგილობრივ სამოქალაქო საზოგადოების ორგანიზაციებთან, მეგობარი ქვეყნების წარმომადგენლობებთან და საერთაშორისო ორგანიზაციებთან.