აჭარის საზოგადოებრივი მაუწყებლის ხელმღვანელობა ჟურნალისტ მალხაზ რეხვიაშვილისგან Facebook-ის იმ პოსტის უარყოფს მოითხოვს, რომლითაც მან კოლეგას, თეონა თურმანიძეს მხარდაჭერა გამოუცხადა.

საქმე ეხება აჭარის მაუწყებლის ჟურნალისტის, თეონა თურმანიძის ეთერიდან მოხსნას ფეისბუქზე პოზიციის დაფიქსირების გამო. თავდაპირველად, თურმანიძემ ჩათვალა, რომ მას სოციალურ ქსელში ქცევის ახალი წესების გამო ედავებოდნენ, რის შესახებაც ინფორმაცია ფეისბუქით გაავრცელა. რამდენიმე დღის შემდეგ კი დაუკონკრეტეს, რომ არა ახალი წესების, არამედ ხელშეკრულებაში ჩაწერილი ერთ-ერთ პუნქტის დარღევევას ედავებიან.

როგორც On.ge-ს თეონა თურმანიძემ უთხრა, მის მსგავსად, მალხაზ რეხვიაშვილსაც არასწორი ინფორმაცია ჰქონდა და ეგონა, რომ მისი კოლეგა ეთერიდან ახალი წესების გამო ჩახსნეს, ამიტომ შესაბამისი მხარდამჭერი პოსტი დაწერა.

თურმანიძის თქმით, მაუწყებლის დირექტორი, გიორგი კოხრეიძე, რეხვიაშვილისგან მოითხოვს, რომ "სიტყვები უკან წაიღოს". ჟურნალისტს მიაჩნია, რომ რეხვიაშვილის მიმართ დაწყებული დევნა უნდა შეწყდეს.

"რადგან ჩავთვალე, რომ ჩემზე გადაწყვეტილება სოციალურ ქსელში ქცევის ახალი წესის გამოძახილი იყო, მალხაზმა დაწერა ჩემზე მხარდამჭერი პოსტი, სადაც თქვა, რომ ადამიანს ედავებიან ახალ წესს, თუმცა ახალი წესი აიტვირთა 20 აპრილს და მას პოსტები 11 და 14 აპრილს ჰქონდა დაწერილი.

მალხაზს ახლა დირექტორმა უთხრა, რომ შენი სიტყვები უკან წაიღე, თუ არადა ვნახავთ როგორ დასრულდება მოკვლევაო. ანუ ერთგვარი გაფრთხილება მისცა. როგორ წაიღებდა უკან, მხოლოდ ახლა გავარკვიე მე თვითონაც რას მედავებოდნენ და მალხაზს როგორ ეცოდინებოდა. მეც გუშინწინ საღამოს გავიგე, რომ მალხაზის მიმართ დისციპლინური დევნა დაიწყეს. რომ მცოდნოდა, რომ ამას კიდევ რაღაც კუდს გამოაბამდნენ და ვიღაც დაისჯებოდა, ბუნებრივია, ამ ყველაფერს უფრო ადრეც დავწერდი", — განაცხადა თურმანიძემ.

მალხაზ რეხვიაშვილმა On.ge-ს უთხრა, რომ მის მიმართ დისციპლინური დევნის პროცესი ჯერ არ დაწყებულა. მისივე თქმით, მას შემდეგ, რაც არხის ხელმძღვანელობამ კოლეგის მხარდამჭერ პოსტში გამოთქმული აზრის საჯაროდ უარყოფა მოსთხოვა, მან დირექტორის სახელზე საპასუხო წერილი გააგზავნა, რომელზე პასუხიც ჯერ არ მიუღია.

როგორც რეხვიაშვილი ამბობს, მასსა და თურმანიძეს ხელშეკრულების ერთი და იმავე მუხლით ედავებიან, თუმცა მაუწყებლის მენეჯმენტის კრიტიკა ამ მუხლით აკრძალული არ არის და დაირღვა თუ არა ზნეობის საყოველთაოდ აღიარებული ნორმა, საჯარო წესრიგი ან სამართალი, სასამართლომ უნდა დაადგინოს.

თეონა თურმანიძეს ახალმა ხელმძღვანელობამ ეთერში გასვლა და რეპორტიორობის უფლება 21 აპრილს შეუწყვიტა. დირექციას მიაჩნია, რომ ჟურნალისტის გამოხატვამ ტელევიზიის იმიჯი დააზიანა.

თეონა თურმანიძე და მალხაზ რეხვიაშვილი იმ ჟურნალისტებს შორის არიან, ვინც ახალი დირექტორის დანიშვნას აქტიურად აპროტესტებდნენ.

ბოლო რამდენიმე თვეა, მას შემდეგ, რაც ტელევიზიის დირექტორი ქართული ოცნების მიერ დაკომპლექტებული ბორდის შერჩეული გიორგი კოხრეიძე გახდა, აჭარის ტელევიზიაში სიტუაცია იძაბება. თანამშრომლები დირექტორის გადაწყვეტილებებს აპროტესტებდნენ, რომლებიც სარედაქციო დამოუკიდებლობის შესუსტების მცდელობად მიაჩნიათ.

კერძოდ, კოხრეიძემ უფლებამოსილება შეუმცირა თავის მოადგილეს, ნათია ზოიძეს, რომელსაც ამ მიზეზით არხიდან წასვლა მოუწია. 19 თებერვალს კი გაუუქმა თანამდებობა საინფორმაციო სამსახურის უფროსის მოადგილეს, მაია მერკვილაძეს. 28 თებერვალს მან სამსახურიდან გაათავისუფლა საზოგადოებრივი მაუწყებლის აჭარის ტელევიზიისა და რადიოს საინფორმაციო სამსახურის უფროსი, შორენა ღლონტი.

4 მარტს აჭარის მაუწყებლის საინფორმაციო სამსახურის უფროსის მოვალეობის შემსრულებლად დაინიშნა გიორგი აბაზაძე, რომელიც სოციალურ ქსელებში ჰომოფობიური და სექსისტური შინაარსის გზავნილებით გამოირჩეოდა. ჟურნალისტების განცხადებით, მისი შერჩევის პროცესი გაუმჭვირვალე იყო. მათი თქმით, დირექტორს, აღნიშნულ თანამდებობაზე ლაშა ზარგინავას ან ირინა ყურუას კანდიდატურას სთავაზობდნენ, თუმცა მათი პოზიცია ხელმძღვანელობამ არ გაითვალისწინა.

6 მარტს დროებით უფლებამოსილება შეუჩერეს ჟურნალისტ თეობა ბაკურიძეს. დირექტორის შესაბამის ბრძანებაში აღნიშნულია, რომ ტელეწამყვანი საინფორმაციო სამსახურის ახალ უფროსზე "ახდენდა ფსიქოლოგიურ ზეწოლას და აიძულებდა აბაზაძეს განცხადების საფუძველზე დაეტოვებინა მისი პოზიცია".

13 მარტს კი ბაკურიძე დირექტორმა სამსახურიდან გაათავისუფლა და მიზეზად შინაგანაწესის უხეში დარღვევა დასახელა. ჟურნალისტი მიიჩნევს, რომ მენეჯმენტის ეს გადაწყვეტილება უსამართლოა და აპირებს ამ თემაზე დავა გააგრძელოს. სასამართლოში თეონა ბაკურიძის და აჭარის ტელევიზიის სხვა ჟურნალისტების უფლებებს EMC დაიცავს. ბაკურიძე ამჟამად TV პირველის ჟურნალისტია.

ამავე თემაზე: