ეკონომიკის მინისტრის ნათია თურნავას თქმით, მთავრობა გეგმავს, სარესტორნო ბიზნესის გამოწვევები ანტიკრიზისულ გეგმაში ასახოს. ამის შესახებ ეკონომიკის სამინისტრო ავრცელებს პრესრელიზს. მათივე ცნობით, ამ საკითხზე საქართველოს რესტორატორთა ასოციაციის ხელმძღვანელებთან ონლაინ შეხვედრა გამართა. უწყების ცნობით, შეხვედრაზე ყურადღება გაამახვილეს კრიზისის გამო საბანკო დავალიანების წარმოქმნასა და მისი რესტრუქტურიზაციის შესახებ.

"საქართველოში სარესტორნო ბიზნესი ერთ-ერთი ყველაზე მოთხოვნადი დარგია. ეს არის ჩვენი სიმდიდრე, მაგრამ დღეს ამ დარგს ძალიან გაუჭირდა. ჩვენ დიდი ყურადღებით შევისწავლით დარგის წინაშე არსებულ გამოწვევებს და მათ ჩვენს სამოქმედო გეგმაში ავსახავთ", — თქვა მინისტრმა.

მინისტრის თქმით, მიმდინარეობს მუშაობა როგორც ანტიკრიზისულ, ასევე პოსტკრიზისული სტიმულირების მექანიზმების ამოქმედებაზე. ნათია თურნავას განცხადებით, დახმარების იმ მოდელს, რომელიც მთავრობამ ტურისტულ სექტორს ჯერ კიდევ პანდემიამდე შესთავაზა, დღეს გადახედვა სჭირდება, რადგან დარგის წინაშე არსებული ზარალი გაცილებით მასშტაბურია.

მისი თქმით, დახმარება მოიცავს როგორც საშემოსავლო და ქონების გადასახადების გადავადებას, ასევე პროგრამის აწარმოე საქართველოში ფარგლებში ბიზნესის სტიმულირების ახალი ინსტრუმენტების ამოქმედებას, როგორიცაა საკრედიტო - საგარანტიო სქემა, საბანკო პროცენტების თანადაფინანსება.