მსოფლიო ბანკმა კორონავირუსთან საბრძოლველად საქართველოს 80 მილიონი დოლარის მოცულობის ფინანსური მხარდაჭერის პაკეტი გამოუყო. ამის შესახებ ინფორმაცია ბანკმა გაავრცელა. მათი თქმით, თანხა ჯანდაცვასა და სოციალურ სფეროში COVID-19-ით გამოწვეული შედეგების შერბილებასა და მათზე რეაგირებაში დაიხარჯება.

აღნიშნული დაფინანსება მსოფლიო ბანკის COVID-19-ზე სწრაფი რეაგირების პაკეტის ნაწილია (FTCF). განცხადებაში აღნიშნულია, რომ მსოფლიო ბანკი, ასევე, თანამშრომლობს აზიის ინფრასტრუქტურის საინვესტიციო ბანკთან თანადაფინანსების ხელშეკრულებით, დამატებით 100 მილიონი დოლარის მოსაზიდად.

"მოსალოდნელია, რომ პროექტი სარგებელს მოუტანს მოსახლეობის ფართო სპექტრს, კერძოდ კი მოსახლეობის ინფიცირებულ და რისკის ქვეშ მყოფ იმ ნაწილს, როგორებიც არიან მოხუცები, ქრონიკული დაავადებების მქონე პირები და ასევე, საგანგებო სიტუაციებზე მომუშავე და სამედიცინო პერსონალი. ჯანდაცვის მიმართულებით COVID-19-ზე რეაგირების საგანგებო ღონისძიებები მოიცავს დაავადების შემთხვევების გამოვლენას და დადასტურებას, ტესტირების ზრდას, ისევე როგორც შემთხვევების სამართავად ჯანდაცვის სისტემის გაძლიერებას", — წერია ბანკის განცხადებაში.

გარდა ამისა, მსოფლიო ბანკი აღნიშნავს, რომ პროექტი გარკვეულ ფინანსურ დახმარებას გაუწევს ღარიბი და მოწყვლადი ჯგუფებისთვის მიზნობრივი სოციალური დახმარების პროგრამის გაფართოებას. პრესრელიზსში აღნიშნულია, რომ ბანკი დროებითი ფულადი ტრანსფერების უზრუნველყოფას იმ პირებისთვის, რომელთაც პანდემიის გამო სამუშაო დაკარგეს.

სამხრეთ კავკასიაში მსოფლიო ბანკის რეგიონულმა დირექტორმა, სებასტიან მოლინეუსმა აღნიშნა, რომ საქართველოსთვის დაფინანსებების პაკეტი დაახლოებით 200 მილიონი დოლარი იქნება. მისი თქმით, ამ თანხას დაემატება 300 მილიონი დოლარის დაფინანსებაც, რომლის გამოყოფაც დაგეგმილი იყო 2020–2021 წლებში ქვეყნის განვითარებისთვის საჭირო ისეთი მნიშვნელოვანი პროექტებისთვის, როგორებიცაა ციფრული კავშირი და ინფრასტრუქტურა.