საერთაშორისო საბიუჯეტო პარტნიორობის გლობალური ანგარიშის მიხედვით, 2019 წლის ღია ბიუჯეტის ინდექსში საქართველო კვლავ მეხუთე ადგილს იკავებს. საქართველოს მხოლოდ ახალი ზელანდია, სამხრეთ აფრიკა, შვედეთი და მექსიკა უსწრებენ.

2012 წლიდან საქართველოს ღია ბიუჯეტის კვლევას საერთაშორისო გამჭვირვალობა — საქართველო ატარებს. კვლევა 2018 წლის 31 აპრილამდე არსებულ მდგომარეობას აფასებს.

ფოტო: TI

ღია ბიუჯეტის ინდექსში საქართველომ 100 ქულიდან 81 მიიღო, რაც 2017 წელთან შედარებით ერთპუნქტიანი გაუარესებაა. როგორ TI განმარტავს, აღნიშნული ცვლილება ძირითადად საერთაშორისო საბიუჯეტო პარტნიორობის მხრიდან რამდენიმე საკითხის შეფასების მეთოდოლოგიის ცვლილებამ გამოიწვია.

TI-განცხადებით, ბიუჯეტის გამჭვირვალობის გასაზომად გამოყენებულია 109 სხვადასხვა ინდიკატორი და მისი მიზანია შეაფასოს, რამდენად უზრუნველყოფს ქვეყნის ცენტრალური მთავრობა რვა ძირითადი საბიუჯეტო დოკუმენტის საზოგადოებისთვის დროულ ხელმისაწვდომობას და არის თუ არა ამ დოკუმენტებში შეტანილი მონაცემები ამომწურავი.

ეს რვა დოკუმენტია:

  • ქვეყნის ძირითადი მონაცემები და მიმართულებები;
  • სახელმწიფო ბიუჯეტის პროექტი;
  • სახელმწიფო ბიუჯეტის შესახებ მიღებული კანონი;
  • მოქალაქის საბიუჯეტო გზამკვლევი;
  • სახელმწიფო ბიუჯეტის კვარტალური შესრულების ანგარიშები;
  • სახელმწიფო ბიუჯეტის ექვსი თვის შესრულების ანგარიში;
  • სახელმწიფო ბიუჯეტის თორმეტი თვის შესრულების ანგარიში;
  • სახელმწიფო აუდიტის სამსახურის ანგარიში სახელმწიფო ბიუჯეტის შესრულების შესახებ.

ბიუჯეტის შედგენის მოქალაქეთა ჩართულობა და ბიუჯეტზე ზედამხედველობა ღია ბიუჯეტის ინდექსის შემადგენელი ნაწილი არ არის და ცალკე საკითხად განიხილება. საერთაშორისო გამჭვირვალობა — საქართველოს განცხადებით, საქართველოს კვლავ აქვს გამოწვევა საბიუჯეტო პროცესში მოქალაქეების ჩართულობის კუთხით. კერძოდ, 100 შესაძლებელი ქულიდან საბიუჯეტო პროცესებში მოქალაქეთა ჩართულობის უზრუნველყოფის მხრივ საქართველომ 28 ქულა (მსოფლიოში მე-14 ადგილი) მიიღო, ბიუჯეტზე ზედამხედველობის მხრივ კი — 82 ქულა (მე-11 ადგილი).

მიღწევების მიუხედავად, საერთაშორისო საბიუჯეტო პარტნიორობა საქართველოს მთავრობას რიგ რეკომენდაციებს სთავაზობს, რომელთა შესრულების შემთხვევაში, ქვეყანა კიდევ უფრო გააუმჯობესებს მიღწეულ შედეგს. ამ მხრივ ყველაზე მნიშვნელოვანი სახელმწიფო ბიუჯეტის პროექტისა და ბიუჯეტის ექვსი თვის შესრულების შესახებ ანგარიშების კიდევ უფრო დახვეწას და მოქალაქეების საბიუჯეტო პროცესში ჩართულობის გაზრდას უკავშირდება.