ინფექციური საავადმყოფოს დირექტორი, თენგიზ ცერცვაძე პლაქვენილით მკურნალობაზე კრიტიკას პასუხობს და ამბობს, რომ საქართველოს აქვს შედეგი — მხოლოდ 5 გარდაცვლილი ქვეყანაში. ამ თემაზე მან გადაცემა ჯანმრთელობის ფორმულაში ისაუბრა.

"შედეგით იზომება ყველაფერი და საქართველო დებს შედეგს, რომელიც არ აქვს ევროპაში პრაქტიკულად არცერთ ქვეყანას. რაც არ უნდა ილაპარაკო, რომ პლაქვენილი არ ვარგა, საშიში პრეპარატია, ეს არის, ის არის, ჩვენ ყველა საშუალო და მძიმე ავადმყოფს პლაქვენილით ვმკურნალობდით და შედეგი გვაქვს ის, რომ 5 გარდაცვლილი გვყავს სულ, — თქვა თენგიზ ცერცვაძემ.

თენგის ცერცვაძის განცხადებით, საქართველო ავადმყოფებისა და გარდაცვლილთა რაოდენობით, ევროპის 53 ქვეყანას შორის 49-ე ადგილზეა. მისი თქმით, ჩვენზე წინ მხოლოდ ჯუჯა სახელმწიფოები არიან. ექიმმა აღნიშნა, რომ პლაქვენილით მკურნალობის პროტოკოლიდან ამოღება არ იგეგმება, რადგან მასზე უკეთესი პრეპარატი ამ კუთხით ჯერ არ გამოჩენილა.

რამდენიმე დღის წინ ამერიკაში მცხოვრებმა ქართველმა ექიმმა, ზურაბ გურულმა ფეისბუქზე კორონავირუსის მკურნალობის ქართული პროტოკოლი გააკრიტიკა. მან განაცხადა, რომ სწორედ ამ პროტოკოლის მიხედვით, პრეპარატ პლაქვენილით საქართველოში უსიმპტომო და მსუბუქ პაციენტებს მკურნალობენ, რაც დაუშვებელი და სახიფათოა.

ქართული პროტოკოლის თანაავტორმა და კორონავირუსის კლინიკური კონტროლის ჯგუფის ხელმძღვანელმა, თენგიზ ცერცვაძემ კი ზურაბ გურული "ფაქტობრივი ტყუილის გავრცელებაში" დაადანაშაულა და თქვა, რომ ქართული პროტოკოლით პრეპარატი მხოლოდ მძიმე ან განსაკუთრებით მძიმე პაციენტებს ენიშნებათ.

ამ თემაზე დეტალურად წაიკითხეთ: