"მოვითხოვთ განათლების რეფორმას", "მოვითხოვთ ქმედითი შრომის ინსპექციის შექმნას", "მოვითხოვთ კეთილდღეობაზე ორიენტირებული ეკონომიკური პოლიტიკის შექმნას", "ნარკოპოლიტიკის ლიბერალიზება" - ეს არის ის ძირითადი მოთხოვნები, რასაც სამოქალაქო აქტივისტები მე-9 მოწვევის პარლამენტს უყენებენ.

აქცია ქუთაისში, პარლამენტის შენობის წინ ამ წუთებშიც მიმდინარეობს. 12 საათზე კი საკანონმდებლო ორგანოში დაგეგმილია ახალი მოწვევის პარლამენტის პირველი სხდომა.

აქციის მონაწილეებმა პარლამენტის წინ მანიფესტი წაიკითხეს, სადაც ჩამოაყალიბეს მთავარი მოთხოვნები. ისინი კანონმდებლებისგან რეალური პოლიტიკის წარმოებასა და იმ საკითხებზე მუშაობას მოითხოვენ, რაც საზოგადოებას რეალურად აწუხებს.

პარლამენტში უკვე იმყოფებიან მთავრობის წევრები და პარლამენტარები. მათ შენობაში შესასვლელად აქციის მონაწილეთა კორიდორის გავლა და მათი მოთხოვნების მოსმენა უწევთ.

აქციის მონაწილეები არიან:

  • ადამიანის უფლებების სწავლების და მონიტორინგის ცენტრი (EMC);
  • მწვანე მუშტი;
  • ქალთა მზერა;
  • თვითორგანიზების ქსელი;
  • აუდიტორია 115;
  • ახალგაზრდა მწვანეები;
  • თეთრი ხმაურის მოძრაობა;
  • თბილისის სოლიდარობის ქსელი;