საქართველოს პრემიერ-მინისტრმა, გიორგი გახარიამ დღეს, 24 აპრილს მთავრობის ანტიკრიზისული გეგმა წარმოადგინა. ეკონომიკურ გეგმაში სხვადასხვა სფეროსთვის დაწესებული შეღავათები და ის ნაბიჯები იყო გაწერილი, რომლის განხორციელებასაც ხელისუფლება უახლოეს მომავალში გეგმავს.

პრემიერმა აღნიშნა, რომ დღეს სოფლის მეურნეობის მნიშვნელობა კიდევ უფრო დიდია და ეს გრძნობა აქვს საქართველოს მოქალაქეებს. მისი თქმით, დღეს კიდევ უფრო მნიშვნელოვანია ფერმერებმა შეძლონ დააკმაყოფილონ ბაზრის მოთხოვნა სასურსათო პროდუქტზე. ამისთვის ხელისუფლება სოფლის მეურნეობის სფეროს წარმომადგენლებს რამდენიმე შეღავათს სთავაზობს:

  • სახელმწიფოს მიკრო საგრანტო სისტემის ზღვარი 30 000 ლარამდე გაიზარდება

"დღეს ჩვენ გადავწყვიტეთ ზღვარი აგვეწია 30 000 ლარამდე და ამ პორტფელის რაოდენობაც გაგვეზარდა 40 მილიონამდე. ეს არის რეალური დახმარება სოფლად მცხოვრები ადამიანისთვის, რომელიც გადაწყვეტს ელემენტარული მცირე ბიზნესის წარმოებას ჩვენ მათ პირდაპირ გრანტის სახით ფინანსური რესურსით ვეხმარებით", — თქვა გიორგი გახარიამ.

  • ერთწლოვანი კულტურების დაფინანსებისთვის 50 მილიონი ლარი გამოიყოფა

"აგროკრედიტი ერთწლოვანი კულტურების დაფინანსების ნაწილში, მოგეხსენებათ დღეს სოფლის მეურნეობის მიმართულებით სულ უფრო მნიშვნელოვანი ხდება პირველადი სასურსათო პროდუქტების წარმოება, სასურსათო ბაზის შექმნა, ამიტომ სახელმწიფომ გამოყო 50 მილიონი ლარი, ამ პროდუქტით შეძლებს ისარგებლოს 5 ათასი ფერმერი. ეს კრიტიკულად მნიშვნელოვანია, რამეთი ერთწლოვანი კულტურები არის სწრაფი ეფექტის მქონე", — თქვა გიორგი გახარიამ.

  • სარწყავი წყლის 2020 წლის გადასახადი გაუქმდება

პრემიერის თქმით, ყველა იურიდიული თუ ფიზიკური პირის გადასახადი, რომელიც 2012 წლის შემდეგ გროვდებოდა გაუქმდება, ჩამოეწერებათ და 2020 წლის საფასურისგან სრულად გათავისუფლდებიან.

"2012 წლის შემდეგ ფიზიკური და იურიდიული პირების მიერ დაგროვილი სარწყავი წყლის გადასახადი გაუქმდება და 20 წლით ამ საფასურისგან ისინი სრულად გათავისუფლდებიან", — აღნიშნა პრემიერმა.

  • რეგისტრაციის გარეშე დარჩენილი მიწის 3 წლის განმავლობაში სრულად რეგისტრირება

გახარიას თქმით, სახელმწიფომ სოფლის მეურნეობის განვითარების გრძელვადიან პერსპექტივაზე უნდა იზრუნოს, ეს კი მიწის სისტემური რეგისტრაციის საბოლოოდ მოგვარებამდე შეუძლებელია.

"იუსტიციის სამინისტროსთან ერთად მიღებულ იქნა გადაწყვეტილება, სამი წლის განმავლობაში მოხდეს მილიონ 200 ათასი ჰექტარი მიწის რეგისტრაცია. დღეის მდგომარეობით ეს მიწის ის რესურსია, რომელიც დარჩენილია რეგისტრაციის გარეშე. ამის შემდგომ ეს პრობლემა საბოლოდ იქნება გადაწყვეტილი", — თქვა გიორგი გახარიამ.

ვის დახმარებას გეგმავს მთავრობა, როგორ აპირებს ამას — ანტიკრიზისული გეგმა

დღეს, 24 აპრილს საქართველოს მთავრობამ კორონავირუსთან საბრძოლველი ანტიკრიზისული გეგმა წარადგინა. გეგმა, რომელსაც ოპოზიცია დაგვიანებულს, მთავრობა კი ეფექტურს უწოდებს რამდენიმე ეტაპს მოიცავს.

პირველი ეტაპი

პირველ ეტაპში გაერთიანებულია ის ნაბიჯები, რომლებიც მთავრობამ აქამდე გადადგა: კომუნალური გადასახადების ნაწილობრივ დაფინანსება, 9 ძირითად სასურსათო პროდუქტზე ფასების დაზღვევა, ტურიზმის სფეროს ბიზნესსუბიექტების საშემოსავლო და ქონების გადასახადის გადავადება, მცირე სასტუმროების სახელმწიფო სუბსიდირების პროგრამა, სესხების რესტრუქტურიზაცია იურიდიული პირებისთვის და ა.შ.

მეორე ეტაპი

რაც შეეხება მეორე ეტაპს, მთავრობა აცხადებს, რომ მისი მიზანია პანდემიის ნეგატიური გავლენის შემცირება ეკონომიკაზე. პრემიერის თქმით, პროგნოზებმა აჩვენა, რომ სხვადასხვა ხარჯების გათვალისწინებით, ბიუჯეტის დასაბალანსებლად 3,9 მილიარდია საჭირო.

მეორე ეტაპში მოექცა სამსახურის გარეშე და უხელფასო შვებულებაში გაშვებული მოქალაქეების დახმარება. მთავრობის გადაწყვეტილებით, ისინი 6 თვის განმავლობაში 200-ლარიან დახმარებას მიიღებენ. რაც შეეხება არაფორმალურ სექტორში დასაქმებულებს, თუ ისინი ერთჯერადად 300 ლარს მიიღებენ.

ამ გეგმის ფარგლებში, მთავრობა ამბობს, რომ დამსაქმებლები ყოველ შენარჩუნებულ სამუშაო ადგილზე მიიღებენ სახელმწიფო სუბსიდიას.

გარდა ამისა, 6 თვის განმავლობაში საშუალოდ 600-ლარიან (თვეში 100 ლარი) დახმარებას მიიღებენ სოციალურად დაუცველები და შშმ პირები.

ანტიკრიზისული გეგმის მეორე ეტაპშია გათვალისწინებული პენსიების საკითხიც, რომელიც 2021 წლის იანვრიდან უნდა ამოქმედდეს:

  • ყველა პენსიონერის პენსია გაიზრდება არანაკლებ ინფლაციის მაჩვენებლისა;
  • 70 წლის და მეტი ასაკის პენსიონერს დაემატება რეალური ეკონომიკური ზრდის 80%.

მთავრობის განმარტებით, ეს ნიშნავს, რომ ფასების ზრდა გავლენას ვეღარ მოახდენს პენსიების რეალურ მოცულობაზე და პენსიის ყოველწლიური ზრდა იქნება ინფლაციაზე მაღალი. ამის გათვალისწინებით, მთავრობა აცხადებს, რომ 70 წლამდე პირებისთვის პენსიის ზრდა არ იქნება 20 ლარზე ნაკლები 70 წელს ზევით კი — 25 ლარზე ნაკლები.

ანტიკრიზისული გეგმა ითვალისწინებს კერძო სექტორის, სოფლის მეურნეობის და აწარმოე საქართველოში მონაწილე მეწარმეების დახმარებასაც.

ეკონომიკის ამოქმედების გეგმა

ეკონომიკის ამოქმედების გეგმა, ანტიკრიზისული გეგმის ნაწილია და თავის მხრივ 6 ეტაპს მოიცავს, რომელთა შორის შუალედი 2 კვირაა. მთავრობის განმარტებით, ეტაპების ამოქმედება დამოკიდებულია ეპიდემიოლოგიურ ვითარებაზე და შესაძლებელია შეზღუდვები ისევ გააქტიურონ, თუ სიტუაცია გაუარესდება.

მაგალითად, პირველი ეტაპი, რომელიც 27 აპრილიდან ამოქმედდება ითვალისწინებს მსუბუქი ავტომობილებითა და ტაქსებით გადაადგილების აღდგენას, ონლაინ ვაჭრობისა და მიტანის სერვისების ამოქმედებას, ასევე, ღია ტიპის აგრარული ბაზრების აღდგენას.

მეორე ეტაპზე, 10 მაისიდან ამოქმედდება მშენებლობები, ავტოსერვისები და სარეკრეაციო ზონები.

გაიგეთ რას ფიქრობს ოპოზიცია ანტიკრიზისულ გეგმაზე: