ძმები, შოთა და ირაკლი გურეშიძეები აცხადებენ, რომ საკარანტინო ზონაში გახარიასა და მთავრობის მისამართით გინების შემდეგ პოლიციამ სასამართლოში გადაიყვანა, სადაც მოსამართლემ დააჯარიმა. ამის შესახებ მათ 23 აპრილს, ფორმულას ეთერში ისაუბრეს. ისინი აღნიშნავენ, რომ გინების დროს მათთვის გამოყოფილ ოთახში მარტო იყვნენ და პოლიცია სწორედ ამის შემდეგ შევიდა მათთან.

მანამდე, ძმები საკარანტინო სივრციდან თვითიზოლაციაში გადასვლას ითხოვდნენ. ერთ-ერთი ძმა იხსენებს, რომ ამ მოთხოვნით პასუხისმგებელ პირთან გასაუბრება მოინდომეს, წინააღმდეგ შემთხვევაში, შიმშილობას დაიწყებდნენ. ამის შემდეგ საკარანტინო სივრცეში პოლიცია მივიდა:

"მივიღეთ უარი თვითიზოლაციაში გადასვლაზე, გვითხრეს, რომ ეს ჩვენი უფლება არ არის. ძალიან უხეში, ძალიან დამამცირებელი, ირონიული დამოკიდებულება იყო. როცა ვთქვით, რომ შიმშილობას დავიწყებდით, სამედიცინოს წარმომადგენელმა თქვა, რომ არ აინტერესებდა ვიშიმშილებდით თუ არა, მთავარი იყო სიცხე გაგვეზომა. მოვითხოვეთ ვინმე კომპეტენტური, ვისაც შეეძლო ამ საკითხის გადაწყვეტა და დავხურეთ კარი, დავბრუნდით ოთახში. ამას მოყვა ლანძღვა გახარიასა და მთავრობის მიმართ ჩემი ძმისგან. ამას კიდე მოყვა პოლიციელთა გაღიზიანება, როგორც ჩანს. კარზე გაისმა ბრახუნი".

მოქალაქე იხსენებს, რომ კარის გაღებისას მათ ოთახში 4 პოლიციელი "შევარდა". მისი თქმით, მათ შორის იყვნენ ისეთებიც, რომლებსაც დამცავი საშუალებები არ ეკეთათ და მათთან [კარანტინში მყოფებთან] პირდაპირი კონტაქტი ჰქონდა.

ერთ-ერთი ძმის თქმით, ისინი ძალადობრივად, ახსნა-განმარტების გარეშე დააკავეს და 4-5 საათი ბორკილებდადებულებმა მანქანაში გაატარეს:

"შემდეგ გადაგვიყვანეს და 2 საათს ვიცადეთ სასამართლოს ეზოში. მიგვიყვანეს და მოსამართლე ჩაგვერთო სკაიპით. ბრალდებაში ჩაწერეს, რომ თითქოს შეურაცხყოფა მივაყენეთ სამედიცინო პერსონალს, პოლიციას, მოკლედ, ავიკელით სასტუმრო. სასამართლოში პოლიციელებმაც დაადასტურეს საკუთრ ჩვენებაში, რომ მათთვის არ გვიგინებია. მე ვუთხარი, რომ ეს არ გამიკეთებია, მაგრამ წარსულში მქონია, როგორც საქართველოს მოქალაქეების 100 პროცენტს და მომავალშიც, სავარაუდოდ, თუ რამეს გააფუჭებდა მთავრობა, გავლანძღავდი მათ. ამის გამო მოსამართლემ დამიწერა მე 1000-ლარიანი, ჩემს ძმასაც 1000-ლარიანი ჯარიმა. თუმცა, მანამდე, პატრულმა გამოგვიწერა 3-3-ათასლარიანი ჯარიმა, საკარანტინო წესების დარღვევისთვის. ეს რაში გამოიხატება არ ვიცი. მანამდე ოთახიც არ დაგვიტოვებია. [...] მოსამართლემ მთავრობის გინება ახსნა, როგორც იგივე პოლიციელზე გინება".

ძმების მდგომარეობის შესახებ განცხადება 23 აპრილს ახალგაზრდა იურისტთა ასოციაციამ გაავრცელა. მათი ინფორმაციით, შოთა და ირაკლი გურეშიძეები საქართველოში 14 აპრილს ჩამოფრინდნენ, ისინი მაშინვე გადაიყვანეს საკარანტინო ზონაში. როგორც ორგანიზაცია განმარტავს, მათ თვითიზოლაციისთვის სათანადო საცხოვრებელი ჰქონდათ, თუმცა გადასვლაზე უარი დაუსაბუთებლად უთხრეს, რის გამოც კარანტინში დარჩენაზე უარი განაცხადეს.

საიას განცხადებით, ხელისმოწერაზე უარის თქმა პოლიციის თანამშრომლებმა მიიჩნიეს ადმინისტრაციულ სამართალდარღვევად, ორივე მათგანს შეუდგინეს ადმინისტრაციული სამართალდარღვევის ოქმები და დააჯარიმეს 3000-3000 ლარით.