მოძრაობა სირცხვილია აცხადებს, რომ ხელისუფლება ქვეყანაში შექმნილი მდგომარეობით სარგებლობს და შერჩევით სამართალს ახორციელებს. ამით ისინი საგანგებო მდგომარეობის პირობებში არსებულ ვითარებას აფასებენ.

გავრცელებულ განცხადებაში წერია, რომ როცა ხელისუფლება არ ეხება ჰიგიენის ნორმების ცალსახად დამრღვევ მრევლს, მაგრამ ძალის გამოყენებით აკავებს მშვიდობიან და დისტანცირებულ აქტივისტებს: "არის ავტორიტარიზმისთვის დამახასიათებელი დამღუპველი პრაქტიკა". ამით მოძრაობა ეხმაურება პარტია გირჩის აქციის დროს აქტივისტების ძალის გამოყენებით დაკავების ფაქტს.

"ხელისუფლება იღებს გადაწყვეტილებებს, რომელთა ლოგიკასაც არ ხსნის, ამ დრომდე მთავრობას არ წარმოუდგენია კრიზისიდან გამოსვლის ეკონომიკური გეგმა. მთავრობამ ალტერნატივის შეთავაზების გარეშე აუკრძალა ქუჩაში მსუბუქი ავტომობილით გადაადგილება ადამიანებს, რომელთათვისაც ეს შემოსავლის ერთადერთი წყარო იყო, შესაბამისად, გაწირა ისინი შიმშილისთვის. სამაგიეროდ, თავად, პირადი გემოვნებისა და ნეპოტიზმის საფუძველზე გასცემს ე.წ. საშვებს მსუბუქი ავტომობილების მფლობელი მეგობრებისთვის, ოჯახის წევრების, ახლობლებისა თუ მსახურებისთვის.

პოლიცია, რომელსაც საგანგებო მდგომარეობაში ადამიანების დაცვის ნაცვლად, მათი დევნა დაევალა, გადაჭარბებული ენთუზიაზმით აჯარიმებს დაკარგული ძაღლის საძებნელად, სახლის ეზოდან 40 ნაბიჯით დაშორებულ ადამიანს და გვერდიგვერდ მსხდომ მეუღლეებს. ხოლო დღეს უკვე იპოდრომზე აჯარიმებს 20 ადამიანზე მეტს და აკავებს პოლიტიკოსებს და აქტივისტებს. მაგრამ, იგივე პოლიცია ამბობს, რომ ვერაფრით აღმოაჩინა წესების დარღვევა ეკლესიის ეზოში შეკრებილი ასობით ადამიანის შემთხვევაში", — წერია განცხადებაში.

გირჩმა იპოდრომზე საგანგებო მდგომარეობის გაუქმების მოთხოვნით აქცია გამართა. იპოდრომზე შეკრებილები დისტანციის დაცვით სეირნობას აპირებდნენ, ზურაბ ჯაფარიძემ ასეც დააანონსა. თუმცა, შეკრებიდან მალევე ადგილზე პოლიცია გამოჩნდა, იქ მყოფი ადამიანები ჯერ დააჯარიმა, შემდეგ კი პოლიციაში გადაიყვანა. მათ შორის, ნაწილი ძალის გამოყენებით.