მესტიაში, სოფელ მულახში სასაზღვრო პოლიციის თანამშრომლის მკვლელობაში ბრალდებული პოლიციას ჩაბარდა. უწყებას მასზე ძებნა 20 აპრილის შემდეგ ჰქონდა გამოცხადებული. პროკურატურაში ამბობენ, რომ ბრალდებული სამართალდამცავებს გუშინ, 22 აპრილს, გვიან ღამით ჩაბარდა.

შემთხვევა სოფელ მულახში 20 აპრილს მოხდა. გამოძიების ინფორმაციით, შსს სასაზღვრო პოლიციის დეპარტამენტის თანამშრომელმა ბ.ნ.-მ ურთიერთშელაპარაკებისას ცეცხლსასროლი იარაღიდან ორჯერ გასროლით, მუცლის არეში სხეულის დაზიანება მიაყენა ამავე სასაზღვრო სექტორის თანამშრომელს ბ.ი.-ს. სასაზღვრო სექტორის თანამშრომელი საავადმყოფოში მიყვანისთანავე გარდაიცვალა, ხოლო ბრალდებული შემთხვევის ადგილიდან მიიმალა.

უწყების ინფორმაციით, გამოძიება საქართველოს სისხლის სამართლის კოდექსის 108-ე მუხლითა და 236-ე მუხლის მეოთხე ნაწილით მიმდინარეობს, რაც განზრახ მკვლელობას გულისხმობს.

On.ge-ს პროკურატურაში უთხრეს, რომ თემაზე მოგვიანებით უწყება განცხადებას გაავრცელებს.