პოლიტიკური პარტია გირჩის ლიდერი, ზურაბ ჯაფარიძე იპოდრომზე გამართული აქციისთვის 3 000 ლარით დააჯარიმეს.

ჯაფარიძე და აქციის სხვა მონაწილეები იპოდრომზე შეიკრიბნენ და "სამკურნალო აქციას" მართავენ.

ჯაფარიძის თქმით, ის ჯარიმის გადახდას არ აპირებს.

ზურაბ ჯაფარიძე იპოდრომზე საგანგებო მდგომარეობის გაუქმებას ითხოვდა. მისი თქმით, ადამიანებმა დაკარგეს შემოსავლები, ვეღარ იხდიან სესხებს და მათ არავინ ეუბნება "როდის შეიძლება დამთავრდეს ეს ჯოჯოხეთი".

ჯაფარიძე აქციის დაანონსების დროს ამბობდა, რომ აქციის ორგანიზატორი თავადაა და მხოლოდ ის უნდა დაჯარიმდეს, სხვები კი იპოდრომზე დისტანციის დაცვით სასეირნოდ გამოვიდოდნენ.

საქართველოში 22 მაისამდე საგანგებო მდგომარეობაა, რომლის მიხედვით, შეკრებები და მანიფესტაციები იკრძალება. აკრძალულია ერთ სივრცეში სამ ადამიანზე მეტის შეკრებაც. თუმცა ამ და სხვა წესების დარღვევის საშუალება მიეცა მართლმადიდებელი ეკლესიის საპატრიარქოს — მათ სააღდგომო წირვა-ლოცვა თითქმის უცვლელი წესით ჩაატარეს და სხვა მოქალაქეებისგან განსხვავებით, ჰქონდათ მანქანებით გადაადგილებისა და 9 საათის შემდეგ შეკრების უფლება.