ნაციონალური მოძრაობის დეპუტატი, რომან გოცირიძე აცხადებს, რომ მისი პარტია საგანგებო მდგომარეობის გახანგრძლივებას პარლამენტში მხარს არ დაუჭერს და პასუხისმგებლობას ამ რეჟიმზე ქართულ ოცნებას უტოვებს. ამის შესახებ მან 22 აპრილის ბიუროს სხდომაზე ისაუბრა:

"როდესაც საგანგებო მდგომარეობას მხარი დავუჭირეთ, ჩვენ თქვენთან ერთად გავიზიარეთ პასუხისმგებლობა. როდესაც ვამბობთ, რომ ჩვენ დღეს მას არ დავუჭერთ მხარს, ეს იმას ნიშნავს, რომ თქვენი პასუხისმგებლობის ფარგლებში ვტოვებთ ამ რეჟიმს. თქვენ გაქვთ 76 საკმარისი ხმა და ამას მიიღებთ. ჩვენთან ერთად რომ ყოფილიყო მხარდაჭერილი, მას ექნებოდა სხვა პოლიტიკური და საზოგადოებრივი დატვირთვა".

რომან გოცირიძემ უმრავლესობას ჰკითხა, თუ რატომ წარადგენს მთავრობა ეკონომიკურ გეგმას პარასკევს [24 აპრილს] და არა დღეს? მანვე დაამატა, რომ დღეს, საგანგებო მდგომარეობის კენჭისყრამდე რომ მოესმინათ ეკონომიკური გეგმა, გადაწყვეტდნენ დაეჭირათ თუ არა მხარი:

"ეს იყო ჩვენი მოთხოვნა, თუ რას უპირებდით ეკონომიკას და სახლში გამოკეტილ მილიონობით უმუშევარ ადამიანს".

საგანგებო მდგომარეობის ვადის გახანგრძლივების თაობაზე პრეზიდენტს პრემიერ-მინისტრმა მიმართა. დღეს, 22 აპრილს, პარლამენტის სესიაზე აღნიშნულ საკითხს კენჭს უყრიან. როგორც ცნობილია, საგანგებო მდგომარეობის გახანგრძლივებას უმრავლესობის დეპუტატების მხარდაჭერა აქვს.