კორონავირუსის გამო, გერმანიაში ბავარიის მიწამ ყოველწლიური ოქტობერფესტი გააუქმა. Bloomberg-ის ჟურნალისტი, ოლივერ საჩგაუ ტვიტერზე წერს, რომ ამას უდიდესი ეფექტი ექნება მიუნხენის ეკონომიკაზე. ოქტობერფესტზე დასასწრებად მიუნხენს ყოველწლიურად ექვსი მილიონი ადამიანი სტუმრობს და ფესტივალს ეკონომიკისთვის დაახლოებით 1 მილიარდი ევრო მოაქვს.

ოქტობერფესტი გერმანიაში, ბავარიის დედაქალაქ მიუნხენში სექტემბრის ბოლოსა და ოქტომბრის დასაწყისში იმართება. დღესასწაული მსგავსი სახელით გერმანიის სხვა ქალაქებშიც ტარდება, თუმცა ტრადიცია დასაბამს მიუნხენში იღებს.

21 აპრილის მდგომარეობით, მსოფლიოში კორონავირუსის 2 480 749 დადასტურებული შემთხვევაა. გერმანია ყველაზე დაზიანებულ ქვეყნებს შორის მეხუთე ადგილზეა, 147 065 ინფიცირებულით. მათ შორის, 4 862 ადამიანი გარდაიცვალა.