ქართული ოცნების დეპუტატი, ირაკლი სესიაშვილი ამბობს, რომ ყოფილი პრეზიდენტის, მიხეილ სააკაშვილის მიერ საქართველოს სახელით მოქმედება იმიჯის დამაზიანებელია. მისი თქმით, სააკაშვილს ფულის მოძიება არ შეუძლია. ამ თემაზე სესიაშვილმა მთავარ არხთან ისაუბრა.

"სააკაშვილი რომ არც ერთი თეთრის მომტანი არ არის, ეს ყველამ კარგად ვიცით, ის არის კლოუნადით დაკავებული, მას არანაირი თეთრის მოძებნა არ შეუძლია, მეტიც, მისი წარმომადგენლობა, საქართველოს სახელით მოქმედება ჩემთვის და ჩვენი ქვეყნისთვის იმიჯის შემლახავია. მას სერიოზულად არავინ არ აღიქვამს", — თქვა ირაკლი სესიაშვილმა.

დეპუტატმა აღნიშნა, რომ სააკაშვილის ქმედებებმა შეიძლება იმ სამ მილიარდსაც საფრთხე შეუქმნას, რომელიც ქვეყანამ კორონავირუსთან საბრძოლველად მოიძია. მიხეილ სააკაშვილმა მთავრობას უცხოური მხარდაჭერის მისაღებად ხელისუფლების დროებითი და ოფიციალური წარმომადგენლის სტატუსი სთხოვა. მან თქვა, რომ თუ 5,5 მილიარდს არ ჩამოიტანს ქვეყანაში, იმდენ დახმარებას მაინც იშოვის, რომ საქართველოს ეკონომიკა გადარჩეს.