ცესკომ საპარლამენტო არჩევნების შემაჯამებელი ოქმი დაამტკიცა. თუმცა, იმის გამო, რომ ოპოზიციის წარმომადგენლები ცესკოს თავჯდომარის, თამარ ჟვანიას შეფასებას, რომლის თანახმადაც არჩევნები სამართლიანად ჩატარდა, არ დაეთანხმნენ, სხდომა ხმაურის ფონზე წარიმართა.

ცესკოს კომისიის წევრი გაერთიანებული დემოკრატიული მოძრაობიდან, ირაკლი ჭყოიძე ამბობს, რომ ის, რაც ამ არჩევნებზე მოხდა, ყოვლად დაუშვებელია სამართლებრივი სახელმწიფოსთვის და თვითონ სახელმწიფო ინტერესებისთვის:

"ხელთ გვაქვს მასობრივად უზუსტო ოქმები, შესაბამისად ამ ოქმების საფუძველზე ნამდვილად ვერავინ დაადგენს, იყო თუ არა ეს შედეგები ადეკვატური ხალხის ნებისა. ზოგადად საარჩევნო გარემო იყო უსამართლო და ამას მოჰყვა ლოგიკური, ბუნებრივი დასასრული, რასაც ჰქვია აბსოლუტურად არაადეკვატური შედეგები".

თამარ ჟვანია კი განმარტავს, რომ მიუხედავად კომისიის ორი წევრის მიერ გამოთქმული განსხვავებული მოსაზრებისა, საარჩევნო ადმინისტრაციამ არჩევნების ჩატარება შეძლო, რომელიც ნეიტრალური არბიტრების მიერ შეფასდა, როგორც კონკურენტული:

"ამავდროულად, ეს არის შეფასებული, როგორც თავისუფალ გარემოში განხორციელებული პროცესი და როგორც პოზიტიურად წინ გადადგმული ნაბიჯი. მე მინდა აღვნიშნო, რომ ძალიან ბევრ შეფასებაშია აღნიშნული, რომ საქართველო თავისი არჩევნებით არის ლიდერი დემოკრატიისა და არჩევნების განვითარების კუთხით რეგიონში".