საპატრიარქოს საზოგადოებასთან ურთიერთობის სამსახურის უფროსი, მამა ანდრია ჯაღმაიძე ამბობს, რომ სახელმწიფოს სტრუქტურების ძალისხმევას მადლიერებით უნდა შეხვდნენ.

ჯაღმაიძის თქმით, ყველა მორწმუნე ადამიანისთვის შეღავათია, რომ აღდგომის მსახურებას შეძლებენ.

"ჩვენ ყველა მადლიერებით უნდა შევუდგეთ ამ საქმეს, რასაც ჩვენ ექიმების და სახელმწიფოს სხვადასხვა სტუქტურების მხრიდან ვხედავთ. ასევე მადლობა ღმერთს იმისთვის, რომ აღდგომის დღესასწაულზე ჩვენ არ გვაქვს სრული კარანტინი და უფრო რთული ვითარება. ამიტომ ვფიქრობ, მორწმუნე ადამიანებისთვის ეს უნდა იყოს ძალიან დიდი შეღავათი და სამადლობელი ყველასთვის, რომ ჩვენ შევძლებთ მსახურების აღსრულებას", — განაცხადა ჯაღმაიძემ.

როგორც ცნობილია, მთავრობისა და საპატრიარქოს შეთანხმების საფუძველზე, სააღდგომო წირვაზე მრევლი ეკლესიაში კომენდანტის საათის დაწყებამდე მივა და მას დილის ექვს საათზე დატოვებს. როგორც ჯაღმაიძე ფიქრობს, ეს შეღავათიანი პირობაა, რათა მრევლი ღვთისმსახურებას დაესწროს.

მთავრობის ინფორმაციით, დიდ ეკლესიებში სააღდგომო ლიტურგია ორმეტრიანი დისტანციით ჩატარდება. მცირე ზომის ეკლესიებში კი მხოლოდ სასულიერო პირები იქნებიან. ამის შესახებ სპეციალურ ბრიფინგზე პრემიერ-მინისტრის პრესსპიკერმა ისაუბრა.

"ჩვენ მივიღეთ ერთობლივი გადაწყვეტილება, რომ არ დაირღვეს კანონი და არ დაიხუროს ეკლესიები. ეკლესიაში დაცული იქნება უსაფრთხოების ყველა ნორმა, რომელიც დადგენილია ჯანდაცვის სამინისტროსა და დაავადებათა კონტროლის ეროვნული ცენტრის მიერ. კერძოდ, დიდი ზომის ეკლესიებში დაცული უნდა იყოს, მინიმუმ 2-მეტრიანი სოციალური დისტანცია, მცირე ზომის ეკლესიებში უნდა იყვნენ მხოლოდ სასულიერო პირები და ეკლესიის მსახურები", — თქვა ირაკლი ჩიქოვანმა.

მისივე ინფორმაციით, ყველა ეკლესიასთან მობილიზებული იქნება პოლიციის ეკიპაჟები, რომლებიც ადგილზე უზრუნველყოფენ კომენდანტის სახით გათვალისწინებული ნორმების და სოციალური დისტანციის დაცვას.