დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

მოქმედ უწყებათაშორის საბჭოსთან ანტიკრიზისული ეკონომიკური ჯგუფი შეიქმნა. ინფორმაციას ამის შესახებ მთავრობის ადმინისტრაცია ავრცელებს და მიუთითებს, რომ ამ ჯგუფში მთავრობის ეკონომიკურ გუნდთან ერთად პარლამენტის შესაბამისი კომიტეტებისა და ეროვნული ბანკის წარმომადგენლები მუშაობენ.

ანტიკრიზისულ ეკონომიკურ ჯგუფსაც პრემიერმინისტრი გიორგი გახარია უხელმძღვანელებს, ხოლო სხვა წევრები, ეკონომიკური გუნდის მინისტრებთან ერთად, იქნებიან:

  • პარლამენტის თავმჯდომარე არჩილ თალაკვაძე;
  • დარგობრივი ეკონომიკისა და ეკონომიკური პოლიტიკის კომიტეტის თავმჯდომარე რომან კაკულია;
  • საფინანსო-საბიუჯეტო კომიტეტის თავმჯდომარე ირაკლი კოვზანაძე;
  • ევროპასთან ინტეგრაციის კომიტეტის თავმჯდომარე დავით სონღულაშვილი;
  • გარემოს დაცვისა და ბუნებრივი რესურსების კომიტეტის თავმჯდომარე ნინო წილოსანი;
  • აგრარულ საკითხთა კომიტეტის თავმჯდომარე ოთარ დანელია;
  • ეროვნული ბანკის პრეზიდენტი კობა გვენეტაძე;
  • თბილისის მერი კახა კალაძე;
  • ბიზნესომბუდსმენი მიხეილ დაუშვილი;
  • პრემიერმინისტრის მრჩევლები:სოზარ სუბარი და ბექა ლილუაშვილი;
  • ინვესტორთა საბჭოს მდივანი გიორგი ჩერქეზიშვილი;
  • პრეზიდენტის ადმინისტრაცია.

მთავრობის ადმინისტრაციის ინფორმაციით, ანტიკრიზისული ეკონომიკური ჯგუფი ვიდეოკონფერენციის ფორმატში რეგულარულად შეიკრიბება და სხდომის ფარგლებში მიღებულ გადაწყვეტილებებზე ინფორმაცია საზოგადოებას ინტენსიურად მიეწოდება.

პრემიერმინისტრ გახარიას თქმით, ხელისუფლების ძირითადი ამოცანა ეკონომიკაზე მიყენებული ზიანის მაქსიმალურად შემცირებაა. მისივე ინფორმაციით, წლის ბოლომდე საერთაშორისო დახმარების სახით 3 მილიარდი აშშ დოლარი იქნება ხელმისაწვდომი.