გამარჯვებული საქართველოს ლიდერი, ირაკლი ოქრუაშვილი, რომელსაც სასამართლომ 5-წლიანი პატიმრობა მიუსაჯა ამბობს, რომ მთავრობა მთლიანად საერთაშორისო პარტნიორების ეკონომიკურ დახმარებაზეა დამოკიდებული. მისი თქმით, ასეთ დროს ხელისუფლება ელჩების წინაშე, 8 მარტს გაფორმებულ შეთანხმებას არ უნდა არღვევდეს. ამის შესახებ ირაკლი ოქრუაშვილმა ფეისბუქზე დაწერა.

"პრობლემას ვერც იმაში ვხედავ, რომ ციხეში ვარ და ვერც იმაში, რომ ივანიშვილის დავალებით 5 წელი მომისაჯეს სრულიად უსამართლოდ. პრობლემა იმაშია, რომ ქვეყანა 90-იანი წლების დონის გაღატაკების ზღვარზე აღმოჩნდება უახლოეს 2-3 თვეში. მთლიანად დამოკიდებული ვართ საგარეო ფინანსურ დახმარებაზე ამერიკისა და ევროკავშირისგან და ამ დროს, ამ ქვეყნების ელჩების წინაშე გაფორმებულ შეთანხმებას არღვევ და მათ წინაშე აღებულ ვალდებულებებს არ ასრულებ", — წერს ირაკლი ოქრუაშვილი.

მისი თქმით, თუ ვინმეს ჰგონია, რომ "ივანიშვილის კაპიკებით" ეკონომიკური პრობლემები მოგვარდება, ძალიან ცდება.

13 აპრილს თბილისის საქალაქო სასამართლომ 20 ივნისის საქმეზე ბრალდებულ ირაკლი ოქრუაშვილის 5 წლით თავისუფლების აღკვეთა მიუსაჯა. სასამართლომ ოქრუაშვილი ძალადობის ორგანიზების ნაწილში გაამართლა, ხოლო მონაწილეობის განხრით გაამტყუნა. 20 ივნისის საქმეზე ამ დრომდე 20-მდე პირია პასუხისგებაში მიცემული, მათ შორისა ნაციონალური მოძრაობის ერთ-ერთი ლიდერი ნიკა მელიაც, რომელიც განაჩენს ელოდება.