დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დღეიდან, 15 აპრილის 21 საათიდან საქართველოს ოთხ ქალაქში: თბილისში, ქუთაისში, რუსთავსა და ბათუმში გადაადგილება იზღუდება. ამ მუნიციპალიტეტებში სპეციალური გამშვები პუნქტები განთავსდება და ქალაქებში შესვლა-გამოსვლა 10 დღის განმავლობაში იქნება აკრძალული.

პრემიერ-მინისტრის პრესსპიკერის, ირაკლი ჩიქოვანის განმარტებით, მუნიციპალიტეტებში შესვლა შეეძლებათ იმ მოქალაქეებს, რომლებიც ამავე მუნიციპალიტეტებში არიან რეგისტრირებულები, თუმცა ისინი ტერიტორიას 10 დღის განმავლობაში ვეღარ დატოვებენ. ტერტორიის დატოვება მხოლოდ იმ მოქალაქეებისთვის იქნება დასაშვები, რომლებიც სხვაგან არიან რეგისტრირებულები.

გარდა ამისა, პრემიერის პრესსპიკერის თქმით, შეზღუდვები არ შეეხებათ:

  • სამედიცინო დაწესებულებების თანამშრომლების გადაადგილებას მათი სამსახურეობრივი მოვალეობიდან გამომდინარე;
  • საერთაშორისო და ადგილობრივ სატვირთო გადაზიდვებს;
  • ბრალდებულებისა და მსჯავრდებულების გადაყვანას;
  • ფულადი სახსრებისა, ძვირფასი ლითონების, ასევე, სხვა ფასეულობების ინკასაციას;
  • ელექტროენერგიის, ბუნებრივი აირისა და წყლის მოწოდებისა და უზრუნველყოფის მიზნით აუცილებელ გადაადგილებას;
  • სატელეკომუნიკაციო, საფოსტო და ნარჩენების მართვასთან დაკავშირებით გადაადგილებას;
  • სამომსახურეო სარკინიგზო მიმოსვლას, რომელიც მხოლოდ ტექნიკურ გადაადგილებასთანაა დაკავშირებული;
  • ჟურნალისტურ საქმიანობას და მედიასაშუალებების წარმომადგენლების ამ მიზნით გადაადგილებას;
  • სარიტუალო მომსახურების გამო გადაადგილებას (მიცვალებულთა გადასვენება ან დაკრძალვა);
  • კერძო დაცვით საქმიანობას;
  • იმ საჯარო დაწესებულებების თანამშრომლების გადაადგილებას, რომელთა საქმიანობაც საგანგებო მდგომარეობის დროს უკიდურესად მნიშვნელოვანია.

ამ გამონაკლისების გარდა, გადაადგილება შეეძლებათ მთავრობის დადგენილებით დაშვებულ ეკონომიკურ საქმიანობაში ჩართულ პირებს, რომლებიც ოპერაციულ შტაბთან შეთანხმებულ სიაში არიან. ასევე, ქალაქებში შესვლა და გამოსვლა ჰუმანიტარული მიზნებისთვის დასაშვები იქნება საერთაშორისო ორგანიზაციების წარმომადგენლებისთვისაც. გადაადგილების უფლება ექნებათ საქართველოში მოქმედ, საერთაშორისო აკრედიტირებული დიპლომატიური კორპუსის წარმომადგენლებს.

ირაკლი ჩიქოვანის განცხადებით, ნებისმიერი გადაადგილების დროს, აუცილებელია, მოქალაქეებს თან ჰქონდეთ პირადობის დამადასტურებელი მოწმობა.

ბოლო მონაცემებით, საქართველოში კორონავირუსით ინფიცირებულია 306 ადამიანი, მათ შორის გამოჯანმრთელებულია 69, ხოლო გარდაცვლილია 3 ადამიანი. კარანტინის რეჟიმში 4 990 პირი რჩება, სტაციონარში მეთვალყურეობის ქვეშ კი 462.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: