ქუთაისის აეროპორტში ჩატარებული ჩხრეკის შედეგად, პოლიციას არ ერთი პირი არ დაუკავებია. უწყების ცნობით, გამოძიება ნარკოტიკული საშუალების უკანონო შეძენა შენახვის და საქართველოში უკანონოდ შემოტანის ფაქტზე დაიწყო:

"დანაშაული გათვალისწინებულია სსკ-ის 260-ე მუხლის I ნაწილით და 262-ე მუხლის I ნაწილით. ოპერატიული ინფორმაციის საფუძველზე, გადაუდებელი აუცილებლობით პირადი ჩხრეკის ჩატარების შესახებ დადგენილების თანახმად, კანონის მოთხოვნათა შესაბამისად, განხორციელდა რამდენიმე პირის ჩხრეკა. ჩხრეკის პროცედურა დასრულებულია. დაკავებული არც ერთი პირი არ არის".

ქეთა გაბუნია ერთ-ერთი მათგანია, რომელიც აეროპორტში გაჩხრიკეს და მოგვიანებით ტომოგრაფიაზე შეამოწმეს. იგი On.ge-სთან საუბარში ჰყვება, რომ მას შემდეგ, რაც ვერაფერი აღმოაჩინეს, პოლიციამ ისინი საავადმყოფოსთან დატოვა:

"გამოგვიშვეს და წამოვედით. რა თქმა უნდა, არაფერი არ აღმოგვაჩნდა. თავიდან გვითხრეს, რომ თვითონ წამოგვიყვანდნენ თბილისში, რადგან ჩვენი მძღოლი აეროპორტიდან გაუშვეს. ბოლოს დაგვტოვეს საავადმყოფოს ეზოში. სახალხო დამცველის წარმომადგენელი რომ არ ყოფილიყო ადგილზე, ისიც არ ვიცოდით ავტოსადგომზე როგორ წავსულიყავით ან ტაქსი როგორ გამოგვეძახებინა.

ტომოგრაფიის პროცედურა ძალიან იშვიათად ტარდება და არ ვიცი ჩვენზე რატომ გამოიყენეს. მენჯის და მუცლის ღრუს ტომოგრაფია გადაგვიღეს."

ქეთა გაბუნია აღნიშნულს იმას უკავშირებს რომ იგი თეთრი ხმაურის მოძრაობის წევრია. იგი ასევე ამბობს, რომ "ოპერატიული ინფორმაცია" იმ პირმა მიაწოდა პოლიციას, რომელიც საქართველოში არ იმყოფება:

"მე ერთადერთი იმას ვუკავშირებ ამას, რომ მე ვარ თეთრი ხმაურის მოძრაობის წევრი, არჩევნებმა ჩაიარა და ახლა კვლავ ისეთი პერიოდია, როცა გააქტიურდა. სხვა ვერანაირ მიზეზს ვერ ვხედავ.

სანამ ტომოგრაფიაზე წავიდოდით აეროპორტში ბარგი, რომ ნახეს და არაფერი არ იყო, ერთმანეთში თქვეს, ვინც ეს გააკეთა საქართველოში არ არის ჩამოსაშვები მოსაკლავიაო".

თეთრი ხმაურის მოძრაობის აქტივისტი და კლუბის მტკვარზე დამფუძნებელი, ხუთ თანმხლებ პირთან ერთად, დღეს, 14 ნოემბერს, ქუთაისის აეროპორტში ბერლინიდან დაბრუნებისას, კრიმინალურმა პოლიციამ გაჩხრიკა.