პრემიერისგან განსხვავებით საპარლამენტო უმრავლესობის წევრები პარლამენტთან, მწვანე ღობის ნაცვლად, 9 აპრილის ბაღში მივიდნენ. პარლამენტის თავმჯდომარემ, არჩილ თალაკვაძე საპარლამენტო უმრავლესობის წევრებთან ერთად 9 აპრილს დაღუპულთა მემორიალ ყვავილებით შეამკო. მემორიალის ყვავილებით შემკობის ფოტომასალა პარლამენტის პრესსამსახურმა გაავრცელა.

ფოტო: საქართველოს პარლამენტი

რუსთაველის გამზირზე, პარლამენტის წინ 9 აპრილის მემორიალი ისევ შემოღობილია, პრემიერ-მინისტრმა გიორგი გახარიამ კი ყვავილები მწვანე ღობესთან მიიტანა.

სარეაბილიტაციო სამუშაოების ირგვლივ დადგმულ მწვანე ღობეზე აქტივისტების მიერ გაკეთებული საპროტესტო წარწერებია. "სირცხვილია", "ბიძინას ბოსტანი", "გადადექი" და სხვა ფრაზები მას შემდეგ დააწერეს მასზე, რაც მერიამ მალხაზ მაჩალიკაშვილის კარავი აიღო, ჯერ იქ საახალწლო ატრაქციონები მოაწყო, მერე კი ტერიტორიის რეაბილიტაცია დაიწყო. საახალწლო ატრაქციონები 2019 წლის 31 დეკემბერს აქტივისტებთან დაპირისპირებისა და დაკავებების ფონზე დაიდგა.

საგანგებო მდგომარეობის მიუხედავად, 2020 წლის 9 აპრილს პარლამენტის წინ პოლიტიკოსები და დაღუპულთა ოჯახის წევრები მივიდნენ.

31 წლის წინ, 1989 წლის 4 აპრილს სეპარატიზმისა და მოსკოვის ანტიქართული პოლიტიკის წინააღმდეგ მშვიდობიანი აქციები დაიწყო, რომელიც მალევე დამოუკიდებლობის მოთხოვნაში გადაიზარდა. 9 აპრილს, გამთენიას რუსულმა არმიამ რუსთაველის გამზირზე შეკრებილი ხალხის დარბევა დაიწყო. მშვიდობიან, ხელაწეულ დემონსტრანტებს მომწამლავი ქიმიური საშუალებები, ცეცხლსასროლი იარაღი, სასანგრე ბარები, ჯავშანტრანსპორტიორები და ტანკები დაუპირისპირეს.

სადამსჯელო ღონისძიებებს 21 ადამიანის სიცოცხლე ემსხვერპლა, მათგან 17 ქალია. ქალებს შორის ყველაზე უმცროსები 16 წლის უფროსი კი 70 წლის. იმდროინდელ ბეჭდურ გამოცემებთან ინტერვიუში აქციის მონაწილეები იხსენებენ, რომ ჯარისკაცები ყველაზე აგრესიულები ორსულების და მოხუცების მიმართ იყვნენ.

გაიგეთ მეტი: