კათოლიკური სამყარო აღდგომის დღესასწაულს 12 აპრილს ზეიმობს. ამ დღეს, იტალიელი ოპერის მომღერალი და მსოფლიოს ერთ-ერთი ყველაზე ცნობილი ტენორი ანდრეა ბოჩელი მილანის საკათედრო ტაძარში იმღერებს.

კონცერტი ცარიელ ეკლესიაში გაიმართება და პირდაპირ ეთერში გადაიცემა. მისი მიზანია შეახსენოს იტალიის მოქალაქეებში სიყვარულის, იმედისა და მძიმე პერიოდიდან თავის დაღწევის მნიშვნელობა.

ბოჩელს აკომპანიმენტს ეკლესიის ორღანისტი, ემანუელ ვიანელი გაუწევს. კონცერტტის პრემიერა ბოჩელის იუთუბ არხზე 12 აპრილს შედგება.

"ჩემთვის დიდი პატივია ეს მოწვევა და მიხარია, რომ დავთანხმდი. მე მჯერა ერთად ლოცვის ძალის. მჯერა ქრისტიანული აღდგომის, როგორც თავიდან დაბადების უნივერსალური სიმბოლოსი. ეს კი ახლა ყველაზე მეტად გვჭირდება", — განაცხადა მუსიკოსმა.

მუსიკა იმედისთვის — ასე ერქმევა ბოჩელის სააღდგომო კონცერტს.

ფოტო: Andrea Bocelli

იტალია 9 მარტიდან სრულ იზოლაციაშია. ქვეყნისთვის კორონავირუსის მიერ გამოწვეული შედეგები მსოფლიო მასშტაბით ერთ-ერთი უმძიმესი აღმოჩნდა. დღევანდელი მონაცემებით, იტალიაში COVID-19-ის ჯამში 135 586 შემთხვევაა დადასტურებული, მათგან გარდაცვლილია 17 127 ინფიცირებული, ხოლო გამოჯანმრთელებულია 24 392 ადამიანი.