მოვლენებით გადატვირთულ კვირას, Facebook უცნაური ქცევით ასრულებს. მომხმარებლები მთელი მსოფლიოდან, საკუთარ პროფილზე საკუთარი გარდაცვალების შესახებ ღებულობენ შეტყობინებას.

თუ ასეთი შეტყობინება თქვენს პროფილზეც ჩანს და ამ სტატიას კითხულობთ, გვინდა დაგამშვიდოთ — ეს ფეისბუქის შეცდომაა და თქვენ ნამდვილად ცოცხალი ხართ.

ასეთი შეტყობინება ხვდება საკუთარ პროფილზე მილიონობით მომხმარებელს

ასეთი შეტყობინება ხვდება საკუთარ პროფილზე მილიონობით მომხმარებელს

ფოტო: The Verge

"იმედი გვაქვს, ადამიანები, ვისაც უყვარდათ [გიორგი], ნუგეშს იპოვიან მისი მეგობრების გაზიარებულ მოგონებებში". სწორედ ეს ტექსტი ჩანს მრავალი მომხმარებლის პროფილზე, სათაურით "გავიხსენოთ [სახელი გვარი]". ამის შესახებ მომხმარებლები სხვადასხვა ქვეყნიდან წერენ, მათ შორის, საქართველოდანაც.

კომპანიას შეცდომების შესახებ ოფიციალური კომენტარი ჯერ არ გაუკეთებია, თუმცა, წინასწარ შეიძლება ითქვას, რომ ამ მასშტაბის დაუდევრობა, ფეისბუქის ზომის სერვისისგან, ინტერნეტს დიდი ხანია არ ახსოვს.

მემორიალიზებული ანგარიშები ფეისბუქზე

სტანდარტულად, ეს შეტყობინება ჩანს იმ პროფილებზე, რომლებიც ფეისბუქის მიერ მემორიალიზებულია. ასე ეწოდება გარდაცვლილი ადამიანის ანგარიშს ფეისბუქზე, რომელიც სტანდარტული პროფილისგან რამდენიმე დეტალით განსხვავდება.

ფეისბუქის აღწერის მიხედვით, მემორიალიზებული ანგარიშის მიზანია, უკვდავჰყოს გარდაცვლილის ცხოვრება, მისი ფოტოები, პოსტები და მისცეს მეგობრებს საშუალება, გააზიარონ ისტორიები და გულისტკივილი მის თაიმლაინზე. ასეთი პროფილი აღარ ჩანს ძიებაში, მეგობრების სიებში და დაბადების დღის შეტყობინებებში.

პროფილის მემორიალიზებისთვის საჭიროა ფეისბუქისთვის შეტყობინების გაგზავნა, სპეციალური ფორმის საშუალებით. ფორმას თან უნდა ერთვოდეს სხვადასხვა დოკუმენტები, რომელიც სიკვდილის ფაქტს და გამგზავნის გარდაცვლილთან კავშირს დაამტკიცებს.