ეკონომიკის მინისტრის, ნათია თურნავას თქმით, ქვეყანაში გამკაცრებული შეზღუდვების ამოქმედების მიუხედავად, ბიზნესისთვის გადაადგილებაზე გამონაკლისი დაშვებულია. მისი თქმით, უსაფრთხო ტრანსპორტირება უსაფრთხო საქმიანობის მნიშვნელოვანი ნაწილია. ამ თემაზე ნათია თურნავამ მთავრობის ბრიფინგზე ისაუბრა.

"სატრანსპორტო საშუალებებში მომატებული რისკია ინფექციის გადადების, გამონაკლისი დაშვებულია ბიზნესისთვის, საწარმოებისთვის, რომ მათ უზრუნველყონ საკუთარი თანამშრომლების გადაადგილება მიუხედავად ყველა აკრძალვისა, თავისი ან დაქირავებული სატრანსპორტო საშუალებებით, მაგრამ ის რომ წესები უნდა იყოს დაცული ძალიან მნიშვნელოვანია", — თქვა ნათია თურნავამ.

მინისტრმა აღნიშნა, რომ კომპანიებს წესების დაცვასთან დაკავშირებით შეამოწმებენ და ტრანსპორტირებაც ამის ერთ-ერთი ნაწილი იქნება. მისი თქმით, გაიდლაინებში გაწერილი წესები ნებისმიერი სატრანსპორტო საშუალებით მგზავრობის დროს უნდა იყოს დაცული.

2 აპრილს მთავრობამ დადგენილებაში ცვლილება შეიტანა და საგანგებო მდგომარეობის პერიოდში ონლაინ ვაჭრობა აღარ შეიზღუდება. ახალი დოკუმენტით, ეკონომიკური საქმიანობების ჩამონათვალს განსაზღვრავს. მასში ვკითხულობთ, რომ დასაშვებია ნებისმიერი ეკონომიკური საქმიანობა, დისტანციურად, მხოლოდ სახლიდან გაუსვლელად.

დადგენილება განმარტავს დისტანციური მუშაობასაც, რაც გულისხმობს სახლიდან მუშაობას, ხოლო კრიტიკულად აუცილებელ შემთხვევებში, ასევე, სამუშაო ადგილიდან, მათ შორის სამსახურიდან, ოფისიდან სადაც იქნება მაქსიმუმ 5 ადამიანი.

2 აპრილს საქართველოში კორონავირუსით ინფიცირებულთა რიცხვი 13-ით გაიზარდა და ჯამში 130-მდე შეადგინა. მათ შორის 26 პირი უკვე გამოჯანმრთელდა. კარანტინის რეჟიმში 5550 ადამიანი რჩება, ხოლო სტაციონარში მეთვალყურეობის ქვეშ — 281.

საქართველოში საგანგებო მდგომარეობის პირობები 30 მარტს გამკაცრდა. პრემიერმინისტრმა თქვა, რომ "ფაქტობრივად კარანტინს" აცხადებენ, რომელიც 31 მარტის 8 საათიდან ამოქმედდა და ასევე "ფაქტობრივ კომენდანტის საათს" ითვალისწინებს.