თვითიზოლაციამ მრავალ საფიქრალთან ერთად თავის მოვლის პრობლემაცგაგვიჩინა: ზოგი შილაკს ვეღარ ვიშორებთ, ზოგს წლობით ნაზარდი წარბის ფორმა გაუფუჭდა, ზოგსაც ძირებში ბუნებრივი ფერის თმა გამოუჩნდა. სილამაზის სალონები დახურულია და არც ვიცით, როდის გაიხსნება, თუმცა ეს არ ნიშნავს, რომ სტილისტები ისვენებენ. ზოგიერთმა სალონმა დისტანციურ რეჟიმზე გადაწყვიტა გადასვლა. არ მოგესმათ, ეს სალონები ცდილობენ, სახლში განმარტოებულებს დაეხმარონ.

ზოგიერთი სტილისტი Facetime-ით ურეკავს კლიენტს და უხსნის, როგორ შეიღებოს თმა. ბრუკლინში მდებარე სალონმა, The Bird House-მა კი გადაწყვიტა, კარანტინისთვის შექმნილი ნაკრები გაეყიდა.

"შეიძლება ეს სულელურად ჟღერდეს, მაგრამ სინამდვილეში ადამიანების გამხიარულება გვინდოდა. წარმოვიდგინეთ, როგორია, როცა ჩაკეტილ სივრცეში ხარ, სავარაუდოდ, უსამსახუროდ, ბავშვებთან ერთად და ამ ყველაფერს კიდევ სარკეში ჩახედვისას შესაღები ძირების დანახვა ემატება", - ამბობს Bird House-ის თანადამფუძნებელი ნიკი ჰუბერტი.

სალონს თითოეული კლიენტის შესაღები "ფორმულა" ბაზაში აქვს აღრიცხული და შეუძლია, რომ მათ ადგილზე მიაწოდოს ნაკრები. გზავნილში საღებავი, ხელთათმანები, თმის სამაგრები, სპეციალური ქუდი და ნაბიჯ-ნაბიჯ ახსნილი ინსტრუქციებია მოთავსებული.

კიდევ ერთი სალონის, Whittemore House-ის დამფუძნებელი ვიქტორია ჰანთერი ამბობს, რომ უკვე ასობით შეკვეთა აქვს ქოლორისტების მიერ დამზადებულ ფორმულებზე. კართან დატოვებული ნაკრები სრულიად უსაფრთხოა: ყველაფერი ხელთათმანებითაა დამზადებული და თითოეული კომპონენტი ანტიბაქტერიული სითხითაა დამუშავებული.

რაც შეეხებათ ახალ კლიენტებს, ამისთვის პროფესიონალებს მხოლოდ დღის შუქზე გადაღებული კარგი ხარისხის სურათი სჭირდებათ, შემდეგ კი კლიენტებს სასურველ ფერამდე მისვლაში ეხმარებიან.

"ადამიანთა დიდ ნაწილს ყოველდღიურ რეჟიმში სახლის ტანსაცმელი აცვია. როცა ამას მოუწესრიგებელი თმაც ემატება, ეს შეიძლება ბევრისთვის ბოლო წერტილი იყოს ("თითქოს პანდემია არ იყო საკმარისი, ახლა თმასაც ვერაფერს ვუხერხებ") - ამბობს სტილისტი რეიჩელ ბოტი, - "ყველა ვეძებთ რაიმეს, რაც თავს უკეთესად გვაგრძნობინებს და საკუთარ თავზე ზრუნვა არასდროსაა ზედმეტი".