აშშ-ს ახლადარჩეული პრეზიდენტის, დონალდ ტრამპისა და მოქმედი პრეზიდენტის, ბარაკ ობამას შეხვედრა თეთრ სახლში დასრულდა. როგორც ტრამპმა განაცხადა, ის, პრეზიდენტის რანგში, ობამასგან რჩევებს მიიღებს. თავის მხრივ, ობამამ გარდამავალ პერიოდში, მას მხარდაჭერა აღუთქვა. ინფორმაციას CNN ავრცელებს.

ბარაკ ობამას განმარტებით, მასსა და ტრამპს შორის საუბარი, როგორც საგარეო, ისე საშინაო პოლიტიკას შეეხო. მისი თქმით, ტრამპს აქვს სურვილი, რომ გარდამავალ პერიოდში მათ ერთად იმუშაონ.

როგორც ობამამ ტრამპს განუცხადა, თუ ის წარმატებული იქნება, მაშინ აშშ-ც იქნება წარმატებული. თავის მხრივ, ტრამპმა ობამას ოვალურ კაბინეტში მიღებისთვის მადლობა გადაუხადა:

"ბატონო პრეზიდენტო, ჩემთვის დიდი პატივია თქვენთან ყოფნა და ველი, რომ ეს კიდევ ბევრჯერ განმეორდება".

როგორც ტრამპმა ჟურნალისტებს განუცხადა, ბარაკ ობამა "ძალიან კარგი კაცია".

რესპუბლიკელმა დონალდ ტრამპმა დემოკრატი ჰილარი კლინტონი აშშ-ს პრეზიდენტის არჩევნებში დაამარცხა და ქვეყნის რიგით 45-ე პრეზიდენტი გახდა.