განათლების მინისტრმა, ალექსანდრე ჯეჯელავამ რადიო პალიტრის გადაცემა რეზიუმეში განათლების სფეროში არსებულ გამოწვევებზე ისაუბრა და განაცხადა, რომ კომბლე მოძალადეა და ცუდი მეცხვარეა:

"ორი პრეტენზია მაქვს. ორი ცხვარი ჰყავს და მეცხვარეს რატომ უნდა ჰყავდეს ორი ცხვარი თუ დაფიქრდებით, მიხვდებით, იმიტომ არის ცუდი მეცხვარე, რომ ცხვრის მოვლით არ არის დაკავებული, კომბლის მთლელია".

განათლების მინისტრის თქმით, ქართული ზღაპრები და მულტფილმები შესაცვლელია:

"ხშირად ვსაუბრობ, ზღაპრის გმირებით დაწყებული, მულტფილმის გმირებით დამთავრებული, რამხელა გავლენა აქვს ადამიანზე მისი ბავშვობის გმირებს. შესაბამისად, შესაცვლელი გვაქვს პრაქტიკულად ყველაფერი. მაგალითად შეამჩნევდით, არ გვაქვს ქართული მულტფილმები. ძველები გვაქვს, რომლებიც საბჭოთა მულტფილმებია".

ჯეჯელავამ ასევე განაცხადა, რომ ზღაპრები და მულტფილმები იმ დროის შესაბამისი იყო, როდესაც ისინი შეიქმნა. მისი თქმით, Spider-man და Superman სასაცილო რაღაცები სულაც არ არის, რადგან ბავშვებისთვის მასწავლებლები და გმირები არიან:

"შესაბამისად, ჩვენ დაწყებული გმირებიდან ესეც გასაკეთებელი გვაქვს, დამთავრებული ზღაპრებით, საბავშვო ლიტერატურით, სახელმძღვანელოებით, სასკოლო პროცესით და ა.შ. სკოლა აღზრდის ინსტრუმენტია და არა ქიმიის ან ისტორიის სასწავლებელი".