საფრანგეთში, ქალაქ კანში მდებარე ფესტივალებისა და კონფერენციების სასახლე ემზადებოდა, რომ კანის კინოფესტივალის ფარგლებში ცნობილი ვარსკვლავები იქ გაშლილ წითელ ხალიჩაზე გაიბრწყინებდნენ, თუმცა შექმნილი მდგომარეობიდან გამომდინარე გადაწყვეტილება მიიღეს, რომ საფესტივალო სივრცე იმ უსახლკაროებისთვის დაეთმოთ, რომლებსაც პანდემიისას იზოლაციისთვის საჭირო თავშესაფარი არ აქვთ.

კანის კინოფესტივალი წელს ამ შენობაში 12-23 მაისს უნდა გამართულიყო, თუმცა კორონავირუსის გავრცელების გამო ორგანიზატორებმა ფესტივალის ჩატარების თარიღი ივნისის ბოლომდე გადადეს.

Reuters-ის ცნობით, საფესტივალო შენობა გასული პარასკევიდან მოყოლებული უსახლკაროებისთვის ღიაა.

"ყოველდღე ჩვენთან 50-დან 70 ადამიანამდე ათევს ღამეს", — ამბობს კანის საფესტივალო შენობის წარმომადგენელი, დომიკე ლასეტი.

საფრანგეთის პრეზიდენტმა, ემანუელ მაკრონმა რამდენიმე დღის წინ ქვეყნის 67-მილიონიან მოსახლეობას მოუწოდა, რომ უსაფრთხოების დაცვის მიზნით სახლში დარჩენილიყვნენ, თუმცა ამის შესრულება დიდი პრობლემაა ქვეყნის იმ დაახლოებით 12 000 უსახლკაროსთვის, რომლებიც ქუჩებში ცხოვრობენ.

კორონავირუსი განსაკუთრებით საშიშია უსახლკაროებისთვის, რადგან მათ სათანადო სანიტარულ პირობებზე ხელი არ მიუწვდებათ და ხშირად სხვადასხვა დაავადებითაც იტანჯებიან, რის გამოც ისინი არსებულ ვითარებაში კიდევ უფრო მოწყვლადები არიან.

სანამ ვინმე საფესტივალო დარბაზში ღამის გათევას დააპირებს, მას შესვლამდე სიცხეს უზომავენ. შენობაში კი ცალკე გამოყოფილია სასადილო სივრცე, სააბაზანო და საერთო ოთახი ტელევიზორითა და გასართობი საშუალებებით, რომლებითაც სარგებლობა მათ თავისუფლად შეუძლიათ.