ლეიბორისტული პარტიის ლიდერი, შალვა ნათელაშვილი ამბობს, რომ დონალდ ტრამპი არის განათლებული ადამიანი, მწერალი, დრამატურგი, ინტელექტუალი და პოლიტიკოსი:

"ამერიკის გამარჯვებულ რესპუბლიკურ პარტიასთან ჩვენ გვაქვს ძალიან მჭიდრო მეგობრული ურთიერთობა, გავაგრძელებთ მუშაობას საქართველოს საკეთილდღეოდ. ვინმე თუ იტყვის, რომ ტრამპი მილიარდელობის გამო აირჩიეს პრეზიდენტად, ეს იქნება დიდი შეცდომა. ეს კაცი არის მწერალი, დრამატურგი, ინტელექტუალი, პოლიტიკოსი, ძალიან კარგად არჩევს მარკ ტვენისა და ჯეკ ლონდონის შემოქმედებას, განსხვავებით ბიძინა ივანიშვილისგან, რომელმაც დღემდე ვერ დაადგინა ყვარყვარე თუთაბერი პოლიკარპე კაკაბაძის დაწერილია თუ რომელიმე ჯავახიშვილის".

აშშ-ს რიგით 45-ე პრეზიდენტი რესპუბლიკელი დონალდ ტრამპი გახდა. პრეზიდენტის არჩევნებში მან დემოკრატების კანდიდატს, ჰილარი კლინტონს მოუგო.

თუმცა, ბოლო მონაცემებით, ჰილარი კლინტონს 59 079 077 ამერიკელი ამომრჩეველი უჭერს მხარს, ხოლო დონალდ ტრამპს 58 941 325, რაც ნიშნავს იმას, რომ კლინტონს ტრამპთან შედარებით 137 752 ხმით მეტი აქვს. მიუხედავად ამისა, არჩევნების საბოლოო შედეგი არ იცვლება, რადგან ტრამპმა ამომრჩეველთა კოლეგიის 276 ხმა უკვე მიიღო, როცა კლინტონს 218 ხმა აქვს. პრეზიდენტობისთვის საჭიროა სულ 270 ხმა.

ნახეთ როგორ ირჩევენ პრეზიდენტს ამერიკაში: საარჩევნო სისტემის დეტალები.