მიუხედავად არსებული სატრანსპორტო შეზღუდვებისა, სხვადასხვა მუნიციპალიტეტში სოფლებიდან ცენტრში და პირიქით მგზავრების გადაყვანა დასაშვებია.

ამის შესახებ პრემიერ-მინისტრის პრეს-სპიკერმა მთავრობაში გამართული საკოორდინაციო საბჭოს სხდომის შემდეგ ისაუბრა.

"თვითმმართველი ქალაქის და მუნიციპალიტეტის ადმინისტრაციული ცენტრის საზღვრებში შეჩერებულია შიდა მიმოსვლა M2 კატეგორიის ტრანსპორტით, ანუ სამარშრუტო ტაქსებით და ავტობუსებით მგზავრთა გადაყვანა. აღნიშნული შეზღუდვა არ ვრცელდება მუნიციპალიტეტების ცენტრსა და სოფლებს შორის სამგზავრო გადაყვანებზე", - აღნიშნა ირაკლი ჩიქოვანმა.

მანვე, კიდევ ერთხელ განმარტა არსებული შეზღუდვები და თქვა, რომ აკრძალულია შიდა გადაადგილება საზოგადოებრივი ტრანსპორტით, იქნება ეს სამარშრუტო ტაქსი თუ ავტობუსი, ასევე, მატარებლით. გაჩერებულია შიდა საჰაერო მიმოსვლაც მგზავრების გადაყვანის მიზნით. მატარებლით შესაძლებელია მხოლოდ სატვირთო გადაზიდვები.


გარდა ამისა, ქვეყანაში საგანგებო მდგომარეობის დასრულებამდე შეჩერებულია ყველა სახის საერთაშორისო სამგზავრო მიმოსვლა — საჰაერო, სახმელეთო და საზღვაო. ჩარტერულ ფრენები იგეგმება საჭიროებისამებრ და ხელისუფლებასთან შეთანხმებით.