ევროკავშირმა სტრიმინგ სერვისების წარმომადგენლებს მოუწოდა, რომ ევროპის მასშტაბით მომხმარებლებისთვის ვიდეოების, ფილმებისა თუ სერიალების მიწოდების ხარისხი შეამცირონ, რათა ინტერნეტი არ გადაიტვირთოს.

ამ შეთავაზებას ერთ-ერთი ყველაზე ცნობილი და პოპულარული სტრიმინგ სერვისი, ნეტფლიქსი დათანხმდა და უახლოესი ოცდაათი დღის განმავლობაში თავისი პროდუქციის მიწოდებაზე ხარისხს გააუარესებს.

"ევროკომისარის, ტერი ბრეტონსა და ნეტფლიქსის თანადამფუძნებელს, რიდ ჰასტინგს შორის გამართული მოლაპარაკებების შემდეგ გადაწყდა, რომ კორონავირუსის მიერ გამოწვეული ექსტრემალური მდგომარეობის შესამსუბუქებლად ევროპაში 30 დღის განმავლობაში სტრიმინგის ხარისხი შევამციროთ", — განაცხადა ნეტფლიქსის წარმომადგენელმა.

აღსანიშნავია, რომ ნეტფლიქსს ევროპაში 51 მილიონი მომხმარებელი ჰყავს, მათგან 11 მილიონი კი დიდ ბრიტანეთში. კორონავირუსის პანდემიით გამოწვეული გამკაცრებული ზომებითა და საყოველთაო თვითიზოლაციით კი ერთდროულად იმაზე მეტი ადამიანი იყენებს ონლაინ სერვისებს, ვიდრე მანამდე, რაც ინტერნეტის გადატვირთვის საფრთხეს აჩენს.

ნეტფლისში ვარაუდობენ, რომ ეს ნაბიჯი 25%-ით შეამცირებს ზოგად გადატვირთვას. ასევე. ამბობენ, რომ ხარისხის შემცირება ყველა მომხმარებელზე არ აისახება და მხოლოდ ნაწილი იგრძნობს სტრიმინგის გაუარესებას.