ადვოკატი მიხეილ რამიშვილი On.ge-სთან ამბობს, რომ კორონავირუსთან დაკავშირებით ცრუ მოკლე ტექსტური შეტყობინებები პაატა ბურჭულაძის შვილების ოფისიდან, თანამშრომელმა გაგზავნა.

მისი ინფორმაციით, ეს ადამიანი ბურჭულაძის შვილებთან რამდენიმე თვეა მუშაობს.

რამიშვილის თქმით, სახელმწიფო უსაფრთხოების სამსახურის თანამშრომლები ამ წუთებშიც ოფისში იმყოფებიან და კომპიუტერულ ტექნიკას ლუქავენ.

"დღეს დილით დარეკეს ოფისში მობილური კომპანიის წარმომადგენლებმა და ამის შესახებ ინფორმაცია მიაწოდეს ბურჭულაძეებს. ახლა ოფისში ჩხრეკა მიმდინარეობს, მოსამართლის განჩინების საფუძველზე ლუქავენ ყველაფერს, მიუხედავად იმისა, რომ სრული ინფორმაცია მიიღეს ყველა დასმულ კითხვაზე. ამ კომპიუტერებში პირადი ინფორმაციაც არსებობს", - ამბობს რამიშვილი On.ge-სთან.

მისივე ინფორმაციით, გამოძიება საქართველოს სისხლის სამართლის კოდექსის 318-ე მუხლით მიმდინარეობს, რაც საბოტაჟს გულისხმობს.

On.ge დაუკავშირდა სუს-ის პრესსამსახურს, სადაც ამასთან დაკავშირებით კომენტარი არ გააკეთეს.

ინფორმაცია იმის შესახებ, რომ პაატა ბურჭულაძის ოფისში სამართალდამცველები იმყოფებიან, თავდაპირველად ინტერპრესნიუსმა გაავრცელა.

კომინიკაციების მარეგულირებელმა კომისიამ 16 მარტს გაავრცელა განცხადება იმის შესახებ, რომ კორონავირუსთან დაკავშირებით მთავრობის მიერ მოქალაქეებთან გაგზავნილი მესიჯების შემდეგ, სადაც იყო მოწოდება ჰიგიენისა და იზოლაციისკენ, სხვა პირებმა ცრუ SMS-ები გაავრცელეს. მათი ინფორმაციით, მთავრობის SMS-ის გავრცელებიდან დაახლოებით ორ საათში მთავრობის სახელითვე "ფეიკ შეტყობინების" გავრცელება დაიწყეს, მოგვიანებით კი, ანალოგიურად ყალბი შეტყობინება გავრცელდა ჯანდაცვის სამინისტროს სახელით.