დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საქართველოს ტერიტორიაზე შემოსვლის მსურველებს შესაძლებლობა ექნებათ კარანტინის ნაცვლად თვითიზოლაციაში იყვნენ.

მათ ქვეყანაში ჩამოსვლამდე 3 დღით ადრე უნდა შეავსონ სპეციალური მოთხოვნის ფორმა, სადაც უნდა მიუთითონ ინფორმაცია პირადი მონაცემების, საიზოლაციო სივრცისა და ადგილზე საკონტაქტო პირის შესახებ. სამინისტროს წარმომადგენლები ამ ტერიტორიას შეაფასებენ და განაცხადს ამის მიხედვით დააკმაყოფილებენ. მათ კომუნიკაცია იმ პირთან ექნებათ, რომელიც საკონტაქტოდ მიუთითა თვითიზოლაციის მსურველმა.

თვითიზოლაციის მოთხოვნა ასევე შესაძლებელია საკარანტინე სივრცეში უკვე მოთავსებული პირებისთვისაც.

მსურველებს თვითიზოლაციის მოთხოვნის ფორმის ჩამოტვირთვა ჯანდაცვის სამინისტროს საიტიდან, ასევე, მთავრობის მიერ შექმნილი სპეციალური ვებ-გვერდიდან შეეძლებათ. შევსებული კითხვარი ელექტრონული ფოსტის საშუალებით კი უნდა გაგზავნონ მისამართზე: [email protected]

ჯანდაცვის სამინისტროში აღნიშნავენ, რომ თვითიზოლაციაში მყოფი მოქალაქეების მონიტორინგს შინაგან საქმეთა სამინისტროსთან ერთად გააგრძელებენ.

იმისთვის, რომ ჩამოტვირთოთ თვითიზოლაციის ფორმა, გადადით ამ ორი ბმულიდან ერთ-ერთზე:

ჯანდაცვის სამინისტროს ვებ-გვერდი

მთავრობის სპეციალური ვებ-გვერდი

ამ დროისთვის, საქართველოში კორონავირუსის 34 დადასტურებული შემთხვევაა, აქედან ერთი გამოჯანმრთელდა და საავადმყოფოდან გაწერეს. ის, ექიმების რეკომენდაციით, 14 დღის განმავლობაში თვითიზოლაციაში იქნება.

პანდემია და რეკომენდაციები

17 მარტის მონაცემებით, საქართველოში კორონავირუსით ინფიცირების 34 შემთხვევაა დაფიქსირებული. ერთ ახალ შემთხვევაზე დღეს ინფექციური საავადმყოფოს დირექტორმა, მარინა ეზუგბაიამ განაცხადა.

34-დან ერთი, პირველი პაციენტი, რომელიც ირანიდან შემოვიდა გამოჯანმრთელდა და გუშინ საავადმყოფოდან გაწერეს. კარანტინში რჩება 1008 ადამიანი, სტაციონარში — 64.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა და უწყებათაშორისი საკოორდინაციო საბჭო მუშაობის საგანგებო რეჟიმზე გადავიდა და შეზღუდვები და რეკომენდაციები გაავრცელა. ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული ისევე, როგორც კაფე-ბარებსა და რესტორნებს. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ასევე, შეიქმნება სპეციალური მექანიზმი, რომელიც საკოორდინაციო საბჭოს გადაწყვეტილებების აღსრულებას შეამოწმებს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: