მთავრობის ადმინისტრაციაში, ეკონომიკის მინისტრმა, დიმიტრი ქუმსიშვილმა ბრიფინგი გამართა და განმარტა, რომ ავტომობილების ტექნიკური დათვალიერების მიზნით, ინტერესთა გამოხატვაში მონაწილეობის მიღება ყველა საერთაშორისო კომპანიას შეეძლება, რომელსაც ევროკავშირის წევრ ქვეყნებში პერიოდული ტექნიკური ინსპექტირების დანერგვის გამოცდილება ექნება:

"ინტერესთა გამოხატვის წარდგენა დალუქული კონვერტებით მოხდება, 2016 წლის 8 დეკემბრის ჩათვლით, ეკონომიკის სამინისტროში. შეფასების პროცესი წარიმართება შესაბამისი სამთავრობო კომისიის მიერ, რომელიც წარმოდგენილ წინადადებების შესწავლის საფუძველზე გამარჯვებულს გამოავლენს. საბოლოო გადაწყვეტილებას საქართველოს მთავრობა მიიღებს".

მან განაცხადა, რომ პერიოდული ტექნიკური ისნპექტირების შედეგად, ტექნიკური ინსპექტირების განმახორციელებელი ცენტრების რაოდენობის განსაზღვრის მიზნით, საქართველოს თითოეულ რეგიონს შეისწავლიან:

"ყველა რეგიონს ცენტრების საკმარისი რაოდენობა მოემსახურება, რათა ინსპექტირების პროცესი შეუფერხებლად წარიმართოს. ჩამოყალიბდება ავტოსატრანსპორტო საშუალებების პერიოდული ტექნიკური ინსპექტირების ცენტრების შენობა-ნაგებობების აღჭურვილობის და ტექნიკური პერსონალის კვალიფიკაციის მიმართ მოთხოვნები. დაინერგება ავტოსატრანსპორტო საშუალებების პერიოდული ტექნიკური ინსპექტირების პროცესის ერთიანი, ცენტრალიზებული მართვის ავტომატიზირებული სისტემა, რომელიც სრულად გამორიცხავს შემოწმების პროცესში კორუფციული გარიგების ალბათობას".